Shillong, Jylliew 03
U Chief Executive Member (CEM) ka Khasi Hills Autonomous District Council (KHADC), Bah Shemborlang Rynjah u la pynshai ba ka jingshim rai jong ka Executive Committee (EC) ka KHADC ban wengkam noh ïa ki 13 ngut ki nongtrei bad ban pynsangeh noh ïa ka jingthungkam ba man ka por ïa kiwei ka dei namar ba kine ki kam ki long ki bym don jingbit.
Haba kren sha ki lad pathai khubor ha ka Sngi Ba-ar hadien katto-katne ba ki nongtrei ka KHADC ki la mih lyngba ki lad pathai khubor ban pynpaw ïa ka jingbym sngewïahap halor ka jingwengkam ïa ki 13 ngut ki nongtrei bad ka jingpynhap kyrdan ïa ki nongtrei kiba la shah thungkam pura (regularised) kum ki nongtrei ‘Casual’, u CEM u la ong ba ka EC ka la lap ba la thungkam haduh 43 ngut ki nongtrei khlem ka jingbit kaba biang bad kumta ka la ai jingmut ban pynkut noh ïa ki 13 ngut bad pynkut noh ruh ïa ka jingtreikam pura na ka bynta ki 30 ngut, kiba la ailad pat ban bteng kum ki nongtrei ba shipor da ka EC.
“Hadien ba la lap ba kine ki 43 ngut kim shym la shah thungkam lyngba ka Post, na ka liang ka EC ka la shim ïa ka rai ban weng noh ïa ki 13 ngut kiba shah thungkam thymmai bad ïa ki 30 ngut pat kiba la shu shah thung pura hadien ba ki la trei kum ki nongtrei ‘casual’, la ailad biang ïa ki ban bteng biang ban trei kum ki ‘Casual'”, ong u CEM.
U CEM u la pynshai ba kine ki jingthungkam ki dei kiba la leh ha u bnai Naitung bad Nohprah jong u snem ba la dep bad ki duna ïa ki kam ba la ai jingbit (sanctioned posts).
U la ïathuh ruh ba ka jingïakren halor kane ka la long haduh san sien haduh ba kin da shim ïa kane ka rai kaba khatduh.
Da kaba bynrap ba namar ka jingïakynduh ïa ka jingeh kaba jur ha ka liang ka pisa tyngka, ka Council ka la shim ïa kine ki sienjam kum ki sienjam ban pynduna ïa ka jingkit kaba khia ha ka liang ka pisa tyngka.
U CEM u la ong ba kine baroh 43 ngut ki nongtrei kiba shah ktah, la ai ïa ki da ka shithi kiba batai ïa ka rai khnang ban lait na ka jingkulmar bad bynrap ba ka jingbud ryntih ïa ki kyndon jingshakri ka lah ban pynsniew ïa ka jinglong jingman.
Na ka liang u Executive Member, Bah Powell Sohkhlet u la ong ba ïa ki nongtrei ba shipor la siew na ka 5% jong ka 15th Finance Commission, kaba mut na ka bynta ki nongtrei kontrak kiba trei ïa ki kam ba ïadei bad ki skhim.
Haba kylli shaphang ka ram kaba ki nongtrei ki la pynpaw ba ki la shim ram na ka jingïarap ka District Council, u Bah Shemborlang u la ong ba kata kam dei ka kam jong ka ophis ban kren eiei.
