Shillong, Jylliew 03
Ka Monlangki Kyndait bad u Knerlang Phawa ki la long ki nongjop ha ka jingïakob mareh ba la tip kum ka “5K Run” ba la pynlong da ka shlem treikam jong ka District Social Welfare Officer (DSWO), East Khasi Hills District ha ryngkat ki bor pynïaid district bad ka District Sports Office ha ka sngi ba-ar.
Ka jingpynlong ïa kane ka jingïakob ka long shi bynta ban rakhe ïa ka International Day against Drug Abuse and Illicit Trafficking 2025 hapoh ka NashaMukt Bharat Abhiyaan.
Kane ka prokram ka thmu ban pynsngewthuh shaphang ki jingma kiba lah ban mih na ka jingdih drok bad ban pynshlur ïa ka jingim kaba koit ba khiah bad kaba lait na u drok, khamtam eh ha ki samla jong ka distrik.
La sdang ïa kane ka prokram da ka jingkren na ka District Social Welfare Officer, Kong E. Kharchandy kaba la pdiang sngewbha ïa baroh ki ‘riew rangbah bad ki nongïashim bynta. Ka la batai ïa ki jingthmu jong ka NashaMukt Bharat Abhiyaan bad ban jur ïa ka jingdonkam jong ka jingïashim bynta lang jong ka imlang-sahlang baroh kawei, khamtam na ki samla, ha ka ban tei ïa ka imlang sahlang kaba lait na u drok.
Kiba la ïadon lang ha kane ka sngi ki long ka Deputy Commissioner (in-Charge), East Khasi Hills District, ka P.K Sangma (MCS) kaba la pynpaw shaphang ka jingdonkam ban don ka jingpynsngewthuh kaba neh, ka jingkitkhlieh lang, bad ka jingïashim bynta radbah jong ki samla khnang ban lait na ki jingdih pynbuaid.
Ïa ka kyrdan ba-ar ha ka liang ki kynthei la ïoh da ka Mary Queen Pale bad balai ka Rukini R.T Dkhar, katba ha ka liang ki shynrang ïa ka kyrdan ba-ar la ïoh da u Marshal Wanñiang bad balai u Rangki Jonathan Pathaw.
