Pynthikna u SP ba shah pynïap u Raja Raghuvanshi, lap ïa ka wait

Shillong, Jylliew 03

Hadien shisngi ba la lap ïa ka metïap jong u Raja Raghuvanshi na ka riat Arliang, na ka liang jong u Superintendent of Police ka East Khasi Hills, Bah Vivek Syiem u la pynthikna ba ka dei ba u la shah pynïap tangba ym pat tip pat ïa ka daw tynrai halor kane.

Haba kren sha ki lad pathai khubor ha ka Sngi Ba-ar, u SP u la ïathuh ba ki pulit ha kane ka jingleit wad bniah ïa ki shi kurim kaba la ïaid sha ka phra sngi, ki la lap ïa ka metïap jong u Raja Raghuvanshi na riat Arliang ha Weisawdong. Nangta ha ka jingleit ban wad ha ka riat kaba don haduh lai syrtap ha ka sngi ba-ar, la lap ruh ïa ka phone bad ruh ïa kawei ka wait kaba dang thymmai kaba la pyndonkam na ka bynta kane ka kam pynïap briew.

U la ong ba kane ka wait kaba la ïoh kurup ka dei kaba dang thymmai bha bad imat kaba la thied thik tang na ka bynta kane ka jingthmu ban pynïap ïa u Raja namar kam dei ka wait kaba rim ne kaba la pyndonkam teng.

U SP u la ong ba haduh mynta ym pat lah ban ong palat hynrei ym artatien shuh ba ka dei ka jingshah pynïap jong u Raja.

“Khlem jingartatien kane ka dei ka kam shah pynïap namar ka met kaba ngi la ïoh mynnin ka pyni shai ba u briew u la shah pynïap, kam don da kawei-kawei pat ka jingkylli bad ngi la rejistar da ka mukotduma ruh halor kane namar ka don ka jingpynjulor ïa ki tiar sakhi bad ka jingïaleh ban buhrieh ïa kane ka kam namar ïa ka met ruh la shu bret bad ka jingthmu ka long ban buhrieh ïa baroh ki sakhi”, ong u SP.

U la ong ba ym pat lah ban tip ruh ïa ka daw jong ka jingshah pynïap la ka dei na ka jingthmu lute ne na kiwei pat ki daw. Ban tip shai halor kane ka jingjia, ka tnat pulit ka dang hap ban wad bad tohkit shuh bad donkam ruh ban ïoh shuh shuh ki sakhi ban lah ban poi sha kaba kham jylliew jong kane ka jingjia.

“Ki jingshisha kin sa paw hadien ka jingtohkit. Ngi donkam ban wad shuh-shuh ïa ki sakhi na ka jaka ba ngi lap bad sha kiwei ki jaka ruh bad ka dei hangta ngin sa tip ïa ki jingshisha”, ong u SP.

Ha kajuh ka por u la ong ba halor kane ka jingjia la dep ban register case pynïap briew bad tad ynda la ïoh ïa ka kaiphod jong ka post mortem yn sa lah ban tip kumno u Raja Raghuvanshi u la shah pynïap hato la pynïap shwa bad sa bret sha riat ne ba u la khlad namar ka jinghap najrong.

Haba kylli halor ka kurim jong u, u SP u la ïathuh ba ïa ka kurim jong u Raja ym pat lapdien satia bad na ka liang ki pulit ha ka sngi Balang kin sa leit biang ban wad ïa ka Sonam ha katei ka jaka bad kumjuh ha ki jaka ba marjan namar ka dei ka riat kaba ïar bha.

“Ngin sa leit biang sha ki jaka kiba marjan jong ka riat kaba long 1-2 Km na kato ka jaka. Ka dei kajuh ka riat jong ka Weisawdong. Kaba kongsan kaba ngin leh mynta ka long ba ngin wad biang ïa ka Sonam,” ong u SP.

Halor ka jingpoi ka Scooty sha Sohrarim, u SP u la ong ba katei ka thuk-thuk ka la leit sha Weisawdong bad ka la wanphai sha Sohrarim.