Shillong, Jylliew 03
Ka lympung ïalehkai District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills District ka la nangjam shaphrang ha ka sngi kaba ar ha Madan Heh Mini Stadium kaba ha Mawlai Phudmuri.
Ha ka jingïalehkai Under-15 ki shynrang, ka OM Roy Memorial HSS, Sacred Heart Boys’ HSS, Umphyrnai Presbyterian SS bad ka H. Elias Memorial HSS ki la lah ban pynthikna ban jam sha ka quarter final.
Ha jingïalehkai pre-quarter final kiba la long ha ka Sngi Ba-ar, ka O. M. Roy Memorial ka la pynliem noh ïa ka St. Peter’s SS, Mawpat da 8-0 kol. U Bapura Dohtdong u la thep marwei haduh san kol (2, 5, 11, 24 & 46), katba ïa kiwei pat la thep da u Pynskhem Syiem (1), Shiborlang Dkhar (6) bad u Aiban-khraw Kurbah (15).
Ka Umpohliew Jingtip ka la shah rem noh ha ka Sacred Heart Boys’ lyngba ka tie-breaker da 4-3 kol hadien ba ïakhaid mar 2-2 kol.
Ka Umphyrnai Pres-byterian ka la lah ban pynliem noh ïa ka St. Gabriel’s HSS da 6-0 kol. U Franky Lymba u la ïoh ïa ka hat-trick da kaba ïoh thep kol ha ka minit kaba 27,30 & 31, kumjuh ïa ar tylli ki kol la thep da u Bankyrshanbor Kharkongor (6 & 24) bad ïa kawei pat la thep da u Aibannangkhraw Kharumnuid (11).
Ka H. Elias Memorial HSS ka la pynliem noh ïa ka Weiloi Secondary School da 2-0 kol lyngba ki ar kol ba la thep da u Damesanbha Susngi ha ka minit kaba 4 bad kawei pat da u S. Seitinthang Haokip (44).
Haba phai sha ka Under-17 jong ki kynthei, ka Ïewryngrep Secondary School ka la jam sha ka semi final hadien ba ka la lah ban pynliem noh ïa ka Umphyrnai Presbyterian SS da 4-0 kol. Ka Quee-nilia Kharnaïor ka la ïoh hat-trick hadien ba ka la ïoh ban thep kol ha ka minit kaba 2, 8 & 23, katba ïa kawei pat la thep da ka Ribakordor Rynjah (32).
Haba phai sha ka Under-17 ki shynrang kan sdang naduh ka sngi Balang ha SAI Training Centre, ha kaba ka St. Peter’s SS Mawpat kan ïakhun pyrshah ïa ka Shillong Vidyalaya SS ha ka por 10 baje, ka Malki Presbyterian SS ïa ka Ramakrishna Mission School ha ka por 11:15, ka Shon Roy Basan SS ïa ka Rev. T.J Junoes Presbyte-rian School ha ka por 12:30 mynsngi bad ha ka por 1:45 nohphai sngi ka Don Bosco HSS ïa ka Weiloi SS.
