Shillong, Jylliew 03
Uwei u rangbah u la shah lute ha ka kynhun ki runar hadien ba u la shah pynbiej ha uwei u briew ban thied ïa u ‘cashew nut’.
Katkum ka khubor ba la ïoh na ki pulit la ong ba uwei u nongshong shnong ha Assam u la ai ka jingujor ba ha ka 27 tarik Jymmang, u la ïoh pdiang ïa kawei ka phone call na u number bym ithuh, ha kaba ïadei bad ka kam ban thied ïa u cashew nut.
La ong ba ha ka 28 tarik Jymmang, une u briew ryngkat bad ar ngut ki briew jong u, ki la hiar sha Doldegre ha West Garo Hills da kawei ka auto rickshaw kaba don ïa u registration number ML08-F-3565. Ha ka por ba ki la poi ha 8th Mile, West Garo Hills, utei u briew bym ithuh uba la phone ruh u la kiew lang ha katei ka kali.
Hynrei la ong ba tang hadien katto-katne, utei u briew bym lah ban ithuh u la pynsangeh noh ïa ka kali jong ki bad ha kane ka por, la wan mih haduh hynñiew ngut ki runar bym lah ban ithuh bad kiba la thombor ïa utei u nong Assam bad ki briew jong u bad ha kajuh ka por ban lute ruh ïa ka pisa kaba long T.75,000/- bad knieh ruh ïa ki mobile phone na ki briew jong u.
