Shah rai pynrem u nongleh be-ijot ryngkat ka shah daiñ kuna

Shillong, Jylliew 03

Ka ïingbishar jong ka Kong MK Lyngdoh, Special Judge (POCSO) ka East Khasi Hills, ka la rai pynrem bad hukum ban set patok haduh 20 snem ïa u runar uba la shah pynngat ha ki kyndon bapher bapher ka POCSO Act bad IPC namar ka jingleh be-ijot khynnah.

Une u runar uba la shah rai pynrem u dei ba la tip kyrteng kum u Pynskhem Mawa uba la shah tiañ bishar katkum ka case no 36 (10) 2020 hapoh ka kyndon 3(a)/4/5(1)/6/7/8/9/10 POCSO Act pule lang bad ka 354/354A/354B/375(sixthly)/376(2)(j)(n)/503/506 IPC ka thanat Sohra.

Ka ïingbishar ha ka hukum ba pynmih ha ka 29 tarik Jymmang, ka la hukum ban set 10 snem ïa une u runar katkum ka kyndon 4 jong ka POCSO bad 4 bnai lada ym lah siew ïa ka kuna.

Ka ïingbishar ka la hukum ruh ban set patok 20 snem bad ka kuna T.50,000 katkum ka kyndon 6 jong ka POCSO Act lem bad 6 bnai lada ym lah ban siew ïa ka kuna.

Une u runar u la ngat ruh ban shong patok sa 3 snem bad ka kuna T.10,000 katkum ka kyndon 8 jong ka POCSO Act lem bad 2 bnai lada ym lah siew ïa ka kuna.

Ka ïingbishar ka la hukum ban set 7 snem lem bad ka kuna T.20,000 hapoh ka kyndon 10 jong ka POCSO Act lem bad 3 bnai lada ym lah siew ïa ka kuna.

Ka ïingbishar ka la hukum ruh ban set 2 snem bad ka kuna T.10,000 hapoh ka kyndon 506 IPC bad lada ym lah siew, un hap shong patok sa 2 bnai.

Ïa kane ka mukotduma la tohkit da ka WPSI V Diengdoh kaba don mynta ha Thanat Sohra.