Shillong, Jylliew 03
Ki kam tuh kam thiem ki nangjur na kawei ka sngi sha kawei pat. Ym tang na ki ïing ki sem bad ki dukan kiba shah prong hynrei wat ki ïingmane ruh kim shngaiñ shuh ha kine ki sngi namar ki runar ki la prong tuh ruh ïa ka ïingmane ha Laban.
Katkum ka khubor na ki pulit la ong ba u Bah Robert L Dkhar u la ai ka jingujor ba hapdeng ka miet jong ka 30 bad 31 tarik u bnai Jymmang, 2025, ki runar bym lah ban ithuh ki la prong tuh hapoh ka building jong ka ïingmane Laban Presbyterian bad ban rah tuh ïa ka pisa kaba ym lah ban tip katno, kaba ki la khlong napoh ki synduk thep pisa kynshew.
Ha kaba ïadei bad kane jingjia, na ka liang jong ki pulit hadien ka jingïoh jingujor, mynta ki la pynlong ka jingtohkit ban lap ïa ki jingshisha bad ruh ban thwet ïa ki runar kiba donkti ha kane ka kam.
