Shillong, Jylliew 03
Ki nongtrei kiba don kumba 27 ngut eiei ha ki tnat treikam bapher-bapher jong ka Khasi Hills Autonomous Dis-trict Council (KHADC) ki la shah kyndang bad shah beh kam ha ka Executive Committee jong ka Voice of the People Party (VPP).
Kine nongtrei kiba la don kumba 27 ngut, kynthup ïa kiba la shah beh kam syndon bad kiba shah pynhiar kyrdan na ka jinglong nongtrei ba pura (permanent) sha ki nongtrei Casual, ha ka Sngi Ba-ar ki la leit ban pan jingpynshai na u Chief Executive Member (CEM) Bah Shemborlang Rynjah hynrei, phewse ki la ïoh da ka jubab ba ka dei ka rai jong ka EC bad ka EC kam lah leh eiei shuh ïa ki bad ba ka EC ka la shim ïa ka rai ban buh noh ïa ki tang kum ki nongtrei ‘Casual’ wat hadien ka jingthungkam pura (regularised) ïa ki ha ki snem ba la dep bad ban beh kam noh ruh ïa ki katto-katne ngut ki nongtrei.
Haba kren sha ki lad pathai khubor, kitei ki nongtrei ki la ong ba ha ka jingleit ban ïakynduh ïa u CEM, u la pynpaw ba yn nym lah shuh ban ailad ïa ki ban bteng ha ka kam kum ki nongtrei bapura bad kitei ki nongtrei ki la ong ruh ba kim tip satia ïa ka daw halor kane ka jingshah pynhap jong ki sha ka ‘Casual’.
“Kum ka jingkylli ïa u, kaei ba un leh na ka bynta jong ngi? Kaei ka daw ba la pynhap ïa ngi sha ka ‘Casual’ namar ïa ka daw kaba shai khlem ai ïa ngi ba la weng kam,” ong kitei ki samla.
Kitei ki nongtrei ki la pynpaw ruh ka jingsngewsih kaba kthang ba kiba bun napdeng ki nongtrei ki dei kiba shim ïa ka ram na ki ‘bank’ ïa kaba la ai jingmynjur bad NOC da ka ophis ban ïoh shim ïa katei ka ram ban thied jaka ban shna ïing, kumta ka la shem jynjar ïa ki da kaei kin siew ïa kata ka ram.
Kitei ki nongtrei ki la ong ba ha ki 6 snem ba ki la don ha ka kam, ki la ïoh rung kam hapoh ka Council khlem ka jingpynbam pisa ïano-ïano ne ban leh da kano-kano ka buit leh bym hok hynrei ki la trei shitom ban ïoh ïa katei ka kam.
“Mynta la 6 snem, ngi ïoh ïa kane ka kam bad kin shu knieh kumto, hato kam ktah? Ngi ruh ngi dei ki khun samla ka Ri, phi ïaleh na ka bynta ki khun samla ka Ri hynrei phi knieh noh ïa ka kam jong ngi ki khun samla ka Ri. Ngin phai shaei bad ngin khmih lynti ïano mynta?,” ong ki nongtrei.
Shuh-shuh, ki la ong ba ki kwah ba u CEM un hap ban shim biang halor kane ka rai bad ong ba kaei kaba la don mynta kan neh bad kaei kaba ki kwah ban leh nangne shakhmat ki mat ïaid la ka jong.
Kitei ki nongtrei ki la ong wat la ki tip shai ba hapoh ka District Council kam ju don kano-kano ka jingpynbna lait kam ne ka eksam thungkam bad baroh ki la shah thungkam da ka jingdon ki briew kiba ïarap ban thepkam ïa ki hynrei ki la pynpaw pat ka jingsngew bym ïahap halor kane namar ki don pat kiba khlem shah wengkam satia.
“Lada phi kwah ban weng, phi dei ban weng shisyndon ïa baroh namar ngim sngewïahap ïa kane ka jingleh jong u CEM,” ong kitei ki nongtrei.
Kitei ki nongtrei ki la ong ba na ka liang u CEM u khlem pynshai eiei halor ka jingweng kam ïa ki bad ong ba ha shwa ba un wengkam, u la dei ban khot lem ïa ki ban batai bad ïakren hynrei ki la shu ai beit tang ka kot kaba la ong ba ki la shah wengkam bad shah pynhap kyrdan.
Na ka liang u Bah Khrawbor Mawlong uba dei uwei na kiba la shah weng kam kum u Pulit Enforcement u la ïathuh ba wat haba ki la kynduh ïa u CEM hynrei u khlem ai kano kano ka jingpynshai.
U la ong ruh ba ka kam jong ki, ka la shu kut noh kynsan kynsan, ha kaba ki la trei naduh u snem 2009 bad don kiba dang shu trei dangshen ruh.
U la ïathuh ruh ba nyngkong ki la trei kum ki ‘Casual’ hynrei hadien pat ka EC barim ka la thung ïa ki kum ki nongtrei ba pura, hynrei u la ong ba ha ka sngi thohdieng katba ki dang trei ïa ka kam, la phah ïa ki ban wan shim ïa ka hukum ha kaba ki dang mut ba ka dei ka hukum ban phah kam ïa ki hynrei phewse, ka dei ka hukum ba la weng noh ïa ki kum ki nongtrei bapura bad pynhiar kyrdan biang kum ki nongtrei ‘Casual’.
U la ïathuh ruh ba haba ki leit kynduh ïa u CEM u la ai ka jubab ïa ki ba kin ym lah shuh ban dang trei kum ki nongtrei bapura hynrei um shym la ïathuh ïa ka daw ba thikna halor ka jingweng ïa ki.
Shuh-shuh, u la ong ruh ba haba kylli ïa u CEM la ka don ne em ka lawei na ka bynta jong ki ban dang neh beit kum ki nongtrei ba pura hynrei u CEM u la jubab ba ka lawei ka kham shitom ïa ki.
