Guwahati, Jylliew:
U Myntri Rangbah ka Assam u Himanta Biswa Sarma ha ka taïew ba la lah u la pynbna ba ka kompeni liengsuiñ kaba remdor ka IndiGo kan sdang noh ïa ka liengsuiñ khlem sangeh hapdeng ka Delhi bad Jorhat naduh ka shiteng jong u Nailur.
“Ka liengsuiñ New Delhi-Jorhat Direct Flight naduh u Naiwieng 2025- Ka la long ka jingsngewkmen ban ïakynduh ïa ki nongïalam ka @IndiGo6E ha New Delhi ban ïakren halor ka Roadmap jong ki na ka bynta ban pynïar ïa ka jingpynïasoh liengsuiñ ha Assam,” la thoh u Myntri Rangbah ha ka rynsan’X’.
U Myntri Rangbah u la ong ba ka kompeni liengsuiñ ka la thmu ban pynbha ïa ka jingpynïasoh liengsuiñ sha kiwei pat ki jaka ha ka jylla. “Nga sngewkmen ban ïasam ba ka IndiGo6E kan sdang ïa ka jingpyntreikam khlem sangeh hapdeng ka Delhi bad Jorhat kaba sdang naduh ka shiteng bnai jong u Nailur 2025,” u la bynrap.
Ha ka jingwan jngoh jong u dang shen sha New Delhi, u Myntri Rangbah ka jylla u la ïakynduh ïa ki nongpynïaid bahakhlieh duh jong ka kompeni liengsuiñ bad kyntu ïa ki ban pynïar ïa ka jingpynïasoh liengsuiñ sha kiwei pat ki jaka ba kongsan ha kylleng ka Assam, khamtam sha Silchar, Dibrugarh, bad North Lakhimpur.
