Shillong, Jylliew 03
U Myntri Rangbah ka Meghalaya u Conrad K Sangma bad u Myntri ka tnat shangkai pyrthei u Bah Paul Lyngdoh ki la ïoh ban sam ïa ka ‘grant’ ne ka jingïarap pisa sha ki 47 ngut ki nongpynmih phlim Khasi Jaiñtia bad Garo lyngba ka Hello Megha-laya kiba kynthup ïa kiba shna phlim kiba jrong, ki phlim lyngkot bad kiwei de ha ka jinglut kaba 6.8 klur tyngka.
Ïa kane ka prokram la pynlong ha ka sngi Ba-ar ha State Convention Centre Shillong ha ka u Myntri Rangbah ka jylla u Conrad Sangma ryngkat u Myntri ba dei peit ïa ka tnat shangkai pyrthei Bah Paul Lyngdoh ki la ïoh pynkup burom ïa u Bah Pradip Kurbah uba dei u Director ka phlim Khasi ‘Ha Lyngkha Bneng’ bad ka kynhun baroh kawei.
Kane ka jingpynkup burom ïa ki nongïashimbynta ka phlim “Ha lyngkha bneng” ka dei namar ka la shah jied ‘Best Film bad Best Director’ ha 47th Moscow International Film Festival 2025 kaba dang shu dep.
Ka jingai jingïarap ka long naduh T.5 lak na ka bynta ki nongshna phlim kiba dang khie dang san kiba thaw ïa ki phlim lyngkot katba T.35 lak na ka bynta ki nongpynïaid kiba la pawnam kiba pynmih ïa ki phlim ba jrong.
Hynriew ngut ki nongshna phlim ki la ïoh ïa ka jingïarap kaba heh tam ha ka kyrdan-A kaba long T.35 lak uwei pa uwei na ka bynta ban pynmih ïa ki phlim ba jrong, katba 18 ngut kiwei pat ki la ïoh T.25 lak hapoh ka kyrdan-B, saw ngut ki nongshna web series ki la ïoh ïa ka jingïarap kaba T.20 lak na ka bynta ki jingthoh ba bun episode, bad 19 ngut ki sap kiba dang mih ki la ïoh ïa ka khusnam T.5 lak tyngka na ka bynta ki projek phlim kiba lyngkot.
Ha kane ka sngi ka tnat Forest jong ka Sorkar Jylla ka la aiti noh ïa ka Ward’s Lake ne kaba la tip kum ka Nanpolok sha ka tnat jngohkai pyrthei ba kan pynitynnad shuh shuh ïa kane ka jaka.
Haba ai jingkren ha kane ka jingïalang u Conrad Sangma u la ong ha ki snem ba la dep ka Sorkar Meghalaya ka la sdang ban plie lad plie lynti ïa ki khynnah samla kiba ha kane ka juk.
U la ong ba ka Sorkar ka la pyrshang ban wanrah ïa ki rukom treikam kaba thymmai ïa ki nongshna phlim ban ïalam lynti ïa ki khynnah samla jong ka jylla khamtam ïa kaei kaba ki sngewtynnad ban leh khnang ban wanrah ka jing myntoi na ka bynta jong ki.
U la ong ba ka Sorkar ka donkam ban ai jingïarap shuh shuh namar ba ki ïohi ba bun napdeng ki khynnah samla ki don shisha ïa kata ka sap, hynrei kaba sngewsih ka long ba ym shym don ki rynsan ba ki khynnah kin sei madan ïa ki sap ba ki don hynrei dei ha kane ka Sorkar kaba mynta la lah ban kyrshan ïa ki.
U la bynrap ruh da kaba ong ba ka Sorkar ka shim ïa kane ka lad ban pynmih ïa ki rynsan watla ka bun ka jinglut jing sep hynrei kan ai ïa ka lad na ka bynta ki khynnah ba don sap ym tang ha ka kam ak phlim, hynrei ha ki kam ïalehkai, ki kam ban seng ïa ki lajong, kumta ka Sorkar ka don ïa ka jingngeit ha ki khynnah samla ba kin lah shisha ban pyndonkam hok ïa ki sap.
U Bah Paul Lyngdoh u la pynpaw kumno kane ka jingthmu ka long ban pynriewspah ïa ka riti dustur trai ri trai muluk kum ki Khasi, Jaiñtia bad Garo lyngba ka kam shna phlim jong ka jylla. U la pdiang sngewbha ïa ki jingai jingmut jong ki paidbah halor ka Meghalaya Film Tourism Policy kaba dang don mynta ha ka jingpynkhreh.
