Imphal, Jylliew:
Ka President ka seng BJP na Manipur Pradesh ka Adhikarimayum Sarda Devi ka la pynpaw ba ki nongïalam ka BJP jong ka seng kmie ki don ka jingangnud kaba pura ban thaw ïa ka sorkar ba ïalam da ka BJP ha Manipur.
Ka la pynpaw ïa kane hadien ka jingïalang ba kyrpang kaba la long ha ophis treikam jong ka BJP ha ki khyndiat sngi jong ka taïew ba la lah.
Haba kren ha ki lad pathai khubor hadien ka jingïakynduh bad ki nongthaw aiñ ka BJP, ka Sarda Devi ka la ban jur ba ka jingthaw ïa ka sorkar thymmai ka dang long ka mat ba kongsan tam na ka bynta ka BJP bad ki paidbah ka Manipur.
Katba u Myntri Rangbah ka jylla u N. Biren Singh u la aiti ïa ka jingiehnoh kam jong u hapdeng ki jingïakynad bad ki jingeh kiba ïadei bad kane, ka Sarda Devi ka la pynthikna ba ki nongthaw aiñ jong ka BJP kin ïai long kawei bad ki kut jingmut ban thaw ïa ka sorkar thymmai ynda la biang ka por.
Ka la kyntait ïa kino kino ki khubor ba don ka jingïapher hapoh ka ri, da kaba bynrap ba ka BJP ka bat ïa ka jingbun paid ha ka ïingdorbar thawaiñ ka jylla Manipur kaba don 60 ngut ki dkhot bad ka dang trei shitom ban thaw ïa ka sorkar thymmai kham kloi katba lah.
U MLA ka BJP u Paonam Brojen uba mihkhmat ïa ka Wangjing Tentha AC ruh u la ïa don lang ha kane ka jingïalang bad u la pynpaw ba ki nongïalam ka seng kmie kin sa jied ïa u Myntri Rangbah ka jylla ban wan napdeng ki nongthaw aiñ ka BJP ynda ki la pynkhreh ban thaw ïa ka sorkar thymmai.
U la bynrap ruh ba ki MLA ka BJP ki dang ap ïa ka rai na ki nongïalam pdeng ha kaba ïadei bad u nongïalam bathymmai jong ka seng ha ka jylla.
Ha ka jingïalang ba la dep ban pynlong, ki MLA jong ka BJP ki la kyrpad ïa ka Sarda Devi ban tyrwa thikna ban thung ïa ka sorkar thymmai sha ki nongïalam ka seng kmie khlem da pynslem shuh. Kaba kham kongsan ka long ba 15 ngut ki MLA ka BJP ki la leit sha ka jingïalang.
Ki nongthaw aiñ kiba dang sah ki la don shabar jong ka jaka treikam, la ïathuh ba ki dang trei ïa ki kam ai jingïarap ha ka jingshlei um ha kylleng ki bynta jong ka jylla.
Nalor kata, ki don 25 ngut ki nongthaw aiñ jong ka BJP ha ka sngi Thohdieng jong ka taïew ba la lah ha ka ïingsah jong u MLA Thongam Biswajit (Thongju AC).
Ka BJP mynta ka bat haduh 37 tylli ki seat ha ka ïingdorbar thaw aiñ jong ka Manipur kaba don 60 ngut ki dkhot, kynthup ïa 5 ngut ki MLA barim jong ka JD(U) kiba la pynïasoh noh hadien sha ka BJP.
