Shillong, Jylliew 04
U Bah Pradip Kurbah uba dei Director ka phlim ‘Ha Lyngkha Bneng’ u la pynpaw ba ka jingslem ban pyndep ïa katei ka phlim ka dei namar ar snem ka la shimpor namar u hap ban leit ringdur sha Sohra.
Haba ïakren bad u Bah Pradip Kurbah hadien ba la wai ka jingïalang shah pynkup burom ha u Myntri Rangbah ka Jylla u Conrad K Sangma bad u Myntri ka tnat shangkai pyrthei Bah Paul Lyng-doh ha State Convention Centre, Shillong u la ïathuh haba u la sdang ban shna ïa kane ka phlim ha u snem 2020 hynrei la hap ban sangeh noh namar la pynthut ka khlam Covid-19.
U la ïathuh biang ba ka bam por sa ar snem namar u hap ban leit ring sha Sohra khnang ban pynwandur ïa kane ka phlim.
Shuh shuh, u Bah Pradip u la ïathuh ba kane ka khusnam Best Director kaba u la ïoh ha ka 47th Moscow International Film Festival, Russia ka dei kaba ar namar ha kaba nyngkong u la ïoh ïa ka phlim Ïewduh ha South Korea.
U la pyntip ba ki don tang 21 tylli ki phlim na kylleng ka pyrthei kiba la shah jied ban ïakhun ha ka 47th Moscow International Film Festival napdeng 1200 tylli ki phlim kiba la phah bad na India ka dei tang ka phlim ‘Ha Lyngkha Bneng’ kaba la ïoh rung.
Nangta u la ai burom ïa u kpa uba la ïalam lynti ïa u ban shna ïa ka phlim ‘Kamon Bajwat’ ban pynkhie im biang ïa ki phlim Khasi hadien ka phlim ‘Manik Raitong’.
Ha kajuh ka por u la ai khublei ïa ka Sorkar Jylla lyngba ka ‘Hello Meghalaya’ kaba la kyrshan ïa ki phlim hapoh ka jylla bad u la kyntu ruh ïa ki nongpynmih phlim ba kin shna bha khnang ban lah pynïaid ïew.
