Shillong, Jylliew 04
Ka Kong Mildres Pyngrope, President ka Meghalaya Talent Search Organisation (MTSO), ka la pyntip paidbah ba kin pynsangeh shwa shipor ïa ka jingkhyllie ïa ka lucky draw kaba ki la dep ban khyllie teng ha ka 31 tarik Jymmang 2025 halor ka jingmih ka huri-hura ha ka por ba pynbna ïa ka result.
Ïa kane ka lucky draw ba ki la dep ban khyllie ka dei kaba la pynlong ha Mawngap Social, Cultural & Sports Club ha ka 31 tarik, hynrei ka la mih noh ka jingkulmar bad huri-hura ha kaba ki hap ban pynsangeh noh shwa ïa katei ka jingkhyllie ïa ki lucky draw.
Ha ka jingïakren ha ka Sngi Balang ka 04 tarik Jylliew 2025, Ka Kong Mildres Pyngrope ka la ïathuh ba ha katei ka sngi ki dang shu dep ban khyllie tang mar shiteng ïa ka lucky draw bad mynta ka sah sa shiteng ki bym pat khyllie lut. Ka jingpynlong ka MTSO ïa kane ka lucky draw bad ka pisa kaba mih ka long kum shibynta ban ïarap ïa ki briew kiba don jingduna ha ki dkhot met.
Haba kylli pat balei ba ka mih ka jingkulmar ha ka katei ka sngi ba khyllie ïa ka lucky draw, na ka liang ka Kong Mildres Pyngrope ka la ïathuh ba kawei ka dei namar ba ka la miet palat bad ki la bun kiba buaid, nalor kata ka la ong ba ki paidbah kiba don ha katei ka jaka ki la kiew hajrong rynsan katba ki dang pynbna ïa ka lucky draw, ha kaba kim lah shuh ban tem ïa katei ka jingjia.
Kumta, ka Kong Mildres Pyngrope ka la pyntip ba kin pynsangeh shwa shipor bad kin sa pyntip pat hadien ïa ka tarik kaba kin sa khyllie biang bad kin leh katba lah ban pyndep noh kham kloi ïa kane ka kam kaba dangsah.
Ki khusnam ha kane ka lucky draw ki long ïa kiba wan nyngkong kin ïoh ïa ka Mahindra Thar, ba ar kin ïoh ïa ka Swift, ba lai kin ïoh ïa ka Alto K-10 bad ba saw kin ïoh ïa ka Yamaha MT-15, nalor katto-katne ki Consolation Prize.
Shuh shuh, ka Kong Mildres ka la ai ka jingkhublei ïa u Rangbah Shnong jong ka shnong Mawngap bad ïa ki Seng Samla Shnong kiba la ïadon ryngkat, bad kiba la ïatrei shitom ban tem ïa katei ka jingjia wat la hapdeng ka jingmih ka kynrum-kynram kaba jur bha haduh ba kin da ïoh ban mih na katei ka jaka bad poi suk sha la ïing.
