Shillong, Jylliew 04
Uwei u samla uba dang 28 snem ka rta u la dkhat noh ïa la ka jingim da kaba sdien phasi ha kawei ka ïing sah wai kaba don ha ka shnong Madanrting, Shillong.
Kane ka la jia ha ka Sngi Balang ka 4 tarik mynta u bnai ha ka por kumba 1.50 nohphai sngi eiei. Ïa kane ka jingjia, la ïoh jingtip na u Rangbah Shnong ka shnong Madanrting ba ka la don kawei ka jingjia pynïap ïalade ne ‘sucide case’ kaba la jia ha Madanrting Block-F.
Halor kane ka jingjia, haba ïoh ban ïakren lyngba ka phone call bad u Rangbah Shnong ka Madanrting, u la ïathuh ba u la ïoh jingtip halor katei ka jingjia ha ka por kumba 2:30 nohphaisngi.
U la ïathuh ba utei u samla u dei uba sah wai ha ka shnong Madanrting bad la u para, bad ki dei na ka shnong Sohkymphor kaba don ha Jaiñtia Hills District.
U Rangbah Shnong u la ïathuh ba u la pyntip noh halor katei ka jingjia sha ki pulit kiba la wan mar-mar sha katei ka jaka ban pynlong ïa ka jingtohkit.
U la ïathuh ba ha katei ka por ba utei u samla u la pynkut ïa la ka jingim, u para jong u um don satia ha ïing namar ba u dang leit bylla bad shuh shuh u Rangbah Shnong u la ïathuh ruh ba kitei ar ngut shipara ki dei kiba la sah wai la kumba 10 snem tam eiei ha Madanrting.
Halor kane ka jingjia, haba la ïoh ban ïakren bad u Superintendent of Police ka East Khasi Hills District, u Bah Vivek Syiem, u la ïathuh ba ïa ka jingtohkit halor kane ka jingjia la leh hapoh ka thanat Madanrting bad la ong ba utei u samla uba la dkhat ïa la ka jingim u dei uba la tip kyrteng kum u Korbar Talang, 28 snem ka rta uba shong-ba sah ha Madanrting Block-F.
Ha ka jingpynlong ïa ka jingtohkit halor kane ka jingïap jong une u samla, la lap ba ka la don ka jingteh ha ka ryndang kaba pyni ïa ka jingsdien phasi jong u.
Na ka liang ki bahaïing hasem ki la kyrpad ban pyllait noh ïa ka jingleh ïa ka Post Mortem namarba kam don kano-kano ka jingsuba sniew ïa kaba la ai jingmynjur da u Bah Silvestre D Phanbuh, MCS, Executive Magistrate bad la pynrung mukotduma halor kane ka jingjia.
