EKH District Level Subroto Cup: Rung semi final sa ka Assam Rifles & St. Anthony’s ha ka U-15

Shillong, Jylliew 04

Ka Assam Rifles Public School bad ka St. Anthony’s HSS ki la long kiwei pat ki kynhun jong ka Under-15 kiba la lah ban pynthikna ban jam sha ka semi final ha ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills District.

Ha ka jingïakhun quarter final kaba la long ha ka Sngi Balang ha Madan Heh Mini Stadium kaba ha Mawlai Phudmuri, ka Assam Rifles Public School ka la pynliem noh ïa ka Don Bosco HSS na Smit da 5-0 kol. U Lazarus Pohthmi u la thep ar kol ha ka minit kaba 21 & 48, katba ïa kiwei pat la thep da u Irungbam Yaiphaba Meitei (8), John Wandon Nongsiej (9) bad u Lalhmimgma wia (13).

Ha kawei pat ka jingïakhun ka St. Anthony’s ka la jop da 3-0 kol ïa ka Shillong Vidhyalaya SS. Ïa kine la thep da u Habankara Blah ha ka minit kaba 7, kumjuh u Silasson Sawkmie (11) bad u Khaigoumang Malouda (14).

Katei ka shlem treikam ka la sdang ruh ïa ki jingïalehkai jong ka Under-17 ki shynrang ha SAI Training Centre ha NEHU ha kaba ka Shillong Vidhyalaya SS ka la pynliem noh ïa ka St. Peter’s SS da 3-0 kol. Ïa kine la thep da u Meteishaphrang Kharlor (3), kumjuh u Ricky Wanñiang (16) bad u Superlative Khongngain (24).

Ka Malki Presbyterian SS ka la shah rem noh ha ka Ramakrishna Mission School lyngba ka shi kol ba la thep da u Bansankupar Rynjah ha ka minit kaba 17. Ka Rev. T.J. Jones Presbyterian School ka la pynliem noh ïa ka Shon Roy Basan SS lyngba ki ar kol ba la thep da u Ïalamehbok War ha ka minit kaba 13 & 57.

Ka Don Bosco HSS ka la pynliem noh ïa ka Weiloi SS lyngba ka shi kol ba la thep da u Balsomio Lyngkhoi ha ka minit kaba 40.