Shillong, Jylliew 04
Ïa ka metïap jong u Bah Hercules Marbañiang, uba la jah mynta la saw sngi lynter, la lap noh ha ka Sngi Balang, na kawei ka nala kaba don ha ka shnong Umlyngpung 12 Mer.
Ki bahaïing bahasem jong u Bah Hercules Marbañiang, u rangbah uba la don ha ka rta kaba 59 snem na ka shnong Umlyngpung 12 Mer, ki la pyntip sha ki pulit jong ka thanat Mawngap halor ka jingjah rngai jong une u rangbah naduh ka 1 tarik mynta u bnai.
Ha ka jingïakren bad ka Kong Virginia Marbañiang kaba dei ka para jong u Bah Hercules lyngba ka phone ha ka Sngi Balang ka 4 tarik Jylliew, 2025, ka la ïathuh, ba u hynmen jong ka, u la jah na la ïing naduh ka 1 tarik Jylliew, 2025, kaba dei ka Sngi U Blei, naduh ka por 6 baje eiei janmiet bad u khlem wanphai ïing shuh. Ka Kong Virginia ka la ïathuh ruh ba naduh ka Sngi Nyngkong hi ki la sdang ban leit ïa wad ïa u Bah Hercules ryngkat bad ki para marjan-marpa, hynrei kim shym la lap dien satia ïa u, wat la ki la wad kylleng ki bynta jong ka shnong.
Ka la ïathuh ba ha ka jingïai bteng ban wad ïa u Bah Hercules, dei ha ka Sngi Balang, hadien ba ki bahaïing bahasem ryngkat bad ka shnong baroh ki la ïamih lut, ki la lap noh ïa ka metïap jong u Bah Hercules kham pajih na ka ïing ba u sah, kata ha ka por kumba 2 baje nohphai sngi, bad la lap ba u la thiah ïap ha kawei ka nala.
“Halor ka jingïap jong u hynmen jong ka, ka Kong Virginia ka la ong, ba kum ka ïing ka sem, kam shym la don kano-kano ka jingsuba sniew eiei bad la suba ba ka jingïap jong u Bah Hercules ka lah ban dei ba u la kyllon hi ha katei ka nala”.
Ka la ong ruh, ba ym don dak da kumwei pat ban suba halor ka jingïap jong u Bah Hercules, namar ba ki la dep ban ujor ejahar sha ki pulit ka thanat Mawngap ha ka por ba u jah na la ïing bad ki bahaïing bahasem ki la pyntip ruh sha ki bor pulit halor ka jinglap ïa katei ka metïap jong u Bah Hercules.
