Shillong, Jylliew 04
Ar ngut ki koidi kiba la ïoh ban phet krad naduh mynshem snem ki la shah kem biang mynta ha ki pulit ka Ri-Bhoi District.
Kine ar ngut ki koidi kiba la shah kem biang ki dei ba la tip kyrteng kum u Sunil Das, 29 snem na College Road, Dudhnoi bad u Pappu Chettri, 32 snem ba la khot sin ruh kum Robert Chettri uba dei na Mawsyntai, Ri-Bhoi District.
Katkum ka tyllong khubor na ki pulit, kine ar ngut koidi ki dei kiba la phet tuh na Nongpoh Civil Hospital ha ka 15 tarik Naiwieng, 2024. Kine baroh ar ngut ki la riehtngen ha Goalpara District ka Assam da ki kyrteng thok.
Ïa u Sunil Das la kem da ki pulit ka Ri-Bhoi ha ka 29 tarik Jymmang, 2025 da ka jingïarap ki pulit ka North Garo Hills. Une u runar u la shah pynngat kam bymman ha ka sien ba nyngkong eh hapoh ka thanat Nongpoh Case No 48(03) 2022 hapoh ka kyndon 224 IPC bad u la pyndep ïa ka jingshong along ha ka 22 tarik Ïaïong, 2023.
Pynban u la shah kem biang bad shah pynngat ha ka Nongpoh Women PS Case No 07(12) 2018 hapoh ka kyndon 5(l)(m)(n)/6 of POCSO Act bad u la ngat shong patok shirta jingim. Une u runar u la don hapoh ka Judicial Custody ha ka por ba u phet tuh.
Ïa u Pappu Chettri la ïoh kem ha ka 3 tarik Jylliew, 2025 da ka jingïarap ki pulit ka North Garo Hills. Une u runar u la shah kem katkum ka Nongpoh Women PS Case No 59 (10)2019 hapoh ka kyndon 341/363/376 (2)(I)IPC.
Shuh shuh ka tyllong khubor ka la ïathuh ba ïa u Sunil Das la dep phah sha patok, katba ïa u Pappu Chettri yn sa phah sha patok ynda ki pulit ka Ri-Bhoi ki la wan ïalam ïa u na Goalpara ban wan tiañ bishar ha ïingbishar Nongpoh.
