Shillong, Jylliew 04
Ka jinglehkmen ki nongkyrshan ha Bengaluru halor ka jingjop jong ka Royal Challengers Bengaluru (RCB) ha ka lympung ïalehkai Indian Premier League hadien 18 snem ka la wanrah ka jingjia kaba sngewsih ha kaba ki la don 11 ngut ki la duh ei ïa la ka jingim na ka daw ka jingshah ïuh bad kumba 50 ngut ki la mynsaw.
Kane ka jingjia ka la sdang hadien ba ki la paidbah ki la ïalum lang hajan ka madan ïalehkai jong ka M Chinnaswamy Stadium na ka bynta ka jingai khublei ïa ka kynhun ba la pynlong da ka Karnataka State Cricket Association (KSCA).
U paidbah bylleiñ uba la ïalum lang shabar jong ka Vidhana Soudha, ha kaba ka kynhun jong ka RCB ki la ïaid shakhmat na ka kad liengsuiñ ban ïakynduh ïa u Myntri Rangbah katei ka jylla u Siddaramaiah.
Ki dur ki pyni ba ki pulit ki la pynkynriah ïa ki briew kiba la mynsaw bad kiba khlem tip briew sha ki jaka sumar kaba don marjan. Bun ki briew kiba la wan ban sakhi ïa ka jingrakhe ki la lyngngoh hapdeng ka jingkhihwin, la ïathuh ki nongpeitkai.
U Myntri Rangbah ka Karnataka, u DK Shivakumar, u la ong ba ka jingïalum paidbah ka long ka “bym lah ban teh lakam”. “Nga panmap na ka bynta ka jingkhapngiah palat,” la ong u Shivakumar. “Ngi la pynbeit palat 5,000 ngut ki bor pahara. Kane ka dei ka kynhun ki samla ba shlur, ngim lah ban pyndonkam lathi halor jong ki.”
“Nga la ïakren bad u Police Commissioner. Hadien nga ruh ngan sa leit da lade sha Hospital ban jngoh ïa kiba la ngat ha kane ka jingjia. Ngam kwah ban pynthut ïa ki doktor kiba sumar ïa ki nongpang. Ïa ka jingkheiñ kaba thikna ym lah ban ïathuh ïa mynta. Ngi la kyrpad ïa ki paidbah ba kin long kiba jaijai. Ngi la pynlyngkot ïa ka prokram tang hapoh shi minit hynrei da ki lak ngut ki briew ki la wan,” la pynpaw u Shivakumar ha ki lad pathai khubor.
Ki jingjia ha ki katto-katne ki steshon metro ha Bengaluru kiba don hajan ka madan ïalehkai ki la pyni ruh ïa ki paidbah kiba bun kiba mih na ki rel bad kiba kiew ïa ki mawkyndon.
Ha Bowring Hospital kaba don hajan, ki kali kit nongpang kiba kit ïa ki briew kiba la mynsaw ki dang ïai bteng ban poi na ka bynta ban buh ïa ki bad ban leit biang sha madan ïalehkai.
La ïohi ïa ki briew ba ki kiew ha u dieng bad ki shong ha ki tnat ban ïoh peit kai ïa ka jingrakhe. Ka sorkar Karnataka, ka la pynsangeh noh ïa ka jingïaid ka kynhun halor kane ka jingjop, naduh Vidhana Soudha, sha katei ka madan ïalehkai, da kaba aidaw halor ka jingbym biang ki bor pahara.
Ki pulit ki la ïathuh ba ki la tehlakam ïa ki paidbah kiba lehkmen naduh ka miet jong ka Sngi Ba-ar. Ha baroh shi miet, ki pulit ki la trei shitom ban pynïaid ïa ki bad ban pynthikna ba kan ym jia kano-kano ka jingjia kaba sniew, la pynpaw ki khubor .
U Myntri ka sorkar pdeng u Pralhad Joshi u la kynthoh ïa ka sorkar Karnataka halor ka jingbym lah ban pynkhreh kaba biang na ka bynta ki paidbah.
“Ka long kaba sngewsih ban ïohi ïa kum kane ka jingduh namar ka jingbym biang ka rukom pynïaid na ka bynta ki paidbah. Ka sorkar jylla ha Karnataka ka la bakla shai ha ka jingkitkhlieh jong ka. Ki jingrakhe ka long kawei, hynrei ka sorkar jylla khlem ka jingthmu kaba biang lypa bad ka la shim ïa ka rai kaba kyrkieh bad kaba lah ban long kaba sngewsih kaba khraw. Ka jingkitkhlieh ka donkam ban pynbeit halor kane ka bynta,” la ong u Joshi ha ka rynsan social media jong ka X.
Shuh shuh u Shivakumar u la ai khublei ïa ka kynhun ïalehkai jong ka RCB hadien ba ki la ïuh-kjat ha Bengaluru ha ka Sngi Balang. U la ai syntiew sha uwei- pa-uwei u nongïalehkai bad khamtam eh u la ai khublei ïa u Virat Kohli, da kaba ai ïa u ïa baroh ar tylli ki lama jong ka kynhun RCB bad ïa ka lama Kannada.
Lah ban pynkynmaw ha katei ka jingïakhun final kaba la long ha ka Sngi Ba-ar, ka RCB ka la lah ban pynliem noh ïa ka Punjab Kings da 6 run na ka bynta ban rah ïa ka nam lahduh.
