Jowai, Jylliew 04
U Ma Wailadmiki Shylla, MLA ka Jowai ryngkat ka jingsynran lang ki ophisar na ka tnat National Health Mission, West Jaiñtia Hills District bad ki nongïalam shnong ha ka 3 tarik Jylliew, u la leit ban jurip ïa ki ar tylli jaka ban tei ïa ar tylli ki Sub Centre.
Ïa kine ar tylli ki Sub Centre yn tei ha ka shnong Sabahmuswang bad ha ka shnong Ialong kiba hap hapoh 2-Jowai Constituency.
U Ma Wailadmiki Shylla haba kren sha ki lad pathai khubor u la ong, “Nga sngewkmen ban pyntip ba ha kine ki khyndiat sngi kiba la dep, ngi la ïoh ïa ka jingmang na ka bynta ar tylli ki Sub Centre hapoh ka 2-Jowai constituency”.
U la pyntip ba ka Sub Centre ha Sabahmuswang kan ai jingshakri ïa ka shnong Sabahmuswang, Mookaswan bad Lad Mynkseh bad pynpaw ruh ka jingkmen namar kine ar tylli ki shnong ki long kiba la biang pura ban ïoh ïa ka Sub Centre. Ka Sub Centre ka dei kaba kongsan tam na ka bynta ka koit ka khiah ha kano-kano ka shnong, la ong u MLA bad u khmih lynti ba da ka jingdon kine ki Sub Centre kan long ka jingmyntoi ïa ki nongshong shnong khamtam ki longkmie bad ki khynnah rit.
