Nongpoh, Jylliew 04
Ha kawei ka jingjia ïatyngkhuh kali kaba la jia ha ka surokbah NH-6 ha Shangbangla, Ri-Bhoi District ha ka step phyrngab jong ka Sngi Balang, kawei ka samla ka la duh noh ïa la ka jingim bad san ngut kiwei pat ki la mynsaw jur.
Kane ka samla kaba dang 25 snem bad kaba la tip kyrteng kum ka Namrita Borah, ka dei kaba dang pule Law ha Guwahati Law College
Ka khubor pulit ka la ïathuh ba ha katei ka step ha ka por kumba 5 duna eiei, kawei ka kali Hyundai Alcazar kaba don ïa u registration number AS01-EV-9579, kaba la ñiah da u Md Ismail Hoque Choud-hury, ka la leit tynrah ïa kawei ka trok ba pynïeng harud surok ha Shang-bangla.
Kane ka la jia na ka jingknieh ïaid shakhmat ïa kawei ka kali.
Ki pulit ki ïathuh ba kane ka kali kaba ïa shong hynriew ngut ki briew, ka dei kaba hiar na Shillong ban leit sha Guwahati hynrei haba poi ha katei ka jaka, bad ha ka por ba u nongñiah jong kane ka kali Hyundai u la pyrshang ban tam shakhmat ïa kawei ka kali, la ïakynduh pynban ïa kane ka jingjia.
Shuh shuh, la ïathuh ba ka Namrita kaba shong markhap ka jingkhang hadien, ka la mynsaw jur na ki bynta ka khlieh bad la pynkit mar-mar sha Civil Hospital, Nongpoh da ka kali paidbah, hynrei na ka liang ki doktor ki la pynbna ba ka la dep khlad lypa ha lynti.
Kiwei pat kiba mynsaw ki kynthup ïa u nongñiah u MD Ismal Hoque Choudhury, u Anayatul Watus, ka samla Gayatri Borah, ka samla Pragya Dihingia bad u Meriganka Borah.
Ïa ka met jong katei ka samla la buh ha ka jaka buh metïap ha Civil Hospital ban pyndep ïa ka post mortem. Ha ka jingtohkit la shem ba ïa kane ka kali Hyundai la kit noh sha Guwahati, Assam ha shuwa ka jingwan poi jong ki pulit ha katei ka jaka.
