Shillong, Jylliew 04
Ki pulit ka Sohra Civil Sub-Division, ki NDRF, ki SDRF ki la lap ïa ka jaket kup slap ne ka raincoat na riat katba ki dang wad ïa ka Sonam Raghuvanshi hajan ka shnong Mawkma ka lynti na Sohrarim sha Weisawdong.
Kane ka jingleit wad ka la sdang biang ha ka step jong ka Sngi Balang ha ka por 10 baje hadien ba ka suiñ bneng ka la shai.
U SDPO ka Sohra Civil Sub-Division, Bah Pynhun Syiem, u la phah ïa ki pulit, NDRF, SDRF ban rung sha riat ban leit wad ïa ka Sonam.
U la phah ruh ïa ki nongtrei North Eastern Space Application Centre ban pynher ïa ka drone ha ka riat bad ka wah haba ka suiñ bneng ka la rang.
Haba kim shym la lapksai eiei, ki la mih noh na Mawkma ha ka por 12 baje mynsngi ban leit biang sha Weisawdong.
Ki pulit ka National Disaster Response Force (NDRF) ryngkat ki nongkiew lum kiba dei na ka kynhun West Jaiñtia Hills District Adventure Sports and Mountaineering Club ki la sdang ban hiar sha ka riat ha Weisawdong lyngba u tyllai uba la teh ha u nar ba ki la pynïeng ha katei ka riat ban leit wad ïa ka Sonam Raghuvanshi.
Ha kane ka sngi la ïohi ba ki pulit NDRF ki la pynïeng ïa u nar ban teh ïa u tyllai ban phah hiar ïa uwei u nongtrei sha katei ka riat.
La ïohi ruh ba u lyoh rben uba shiphang u jah bad shiphang u wan biang, uba la pynthut ïa ka jingwad ïa ka Sonam Raghuvanshi ha katei ka riat.
Ka jingpynher ïa ka drone ban wad ïa katei ka kurim u Raja Raghuvanshi ka la don jingthut naba wan kah u lyoh rben.
Namar ba ka la jan kem dum ka suiñ bneng, ki pulit ka Sohra Civil Sub-Division ki hap sangeh noh ban wad ïa ka Sonam bad kin bteng biang ban wad ha ka Sngi Palei ka 5 tarik Jylliew 2025 ha Weisawdong.
U Lal Ringsan, Inspector ka NDRF u la ong ba ka jaka sha kiwei ki thaiñ hapoh ka ri India bad ha Meghalaya ka ïapher shibun bha.
U la ong ba ka NDRF ka la trei ïa kum kane ka kam ha kiba bun tyllli ki jaka hapoh ri India kynthup ha Kashmir kaba jur tam ka jingkhriat, bad ha Rajasthan kaba ka jingshit ka poi ha ki 50 degree celsius hynrei u la ong ba ka jaka ha Meghalaya ka pher shibun ban na kiwei pat ki jaka namar ka jingrben ki khlaw.
Hynrei u la ong ba wat la katta ruh ki la trei shitom ban leit wad shaduh ka trai jong ka riat Weisawdong, u la ong ba ka long kaba eh haduh katta-katta namar ba ka jaka ka dei kaba don ïa ki khlaw kiba rben ha ryngkat ki maw kiba btuid bad kumjuh ruh ka jingbym ïohi bha namar ka jingdum lyoh.
U la ïathuh ruh ba wat la ki don ki jaka ba ki briew bad ki drone kin ym lah ban poi hynrei ka NDRF ka la shim ïa ka thong ban leit wad sha kitei ki jaka. Kumta u la ong ba na ka liang ka NDRF ka trei shitom hynrei namar ka jingbym lah ban ïohi bha bad ka jingrben ka khlaw kim shym lah ban poi shaduh sha trai.
U la ong ba mynta ki la sangeh shwa ban wad bad kin sa bteng pat lashai ka sngi bad ha kiwei ki sngi.
