Nongstoiñ, Jylliew 04
Ka District Level Nasha Mukht Bharat Abhiyan Campaign, West Khasi Hills, District hapoh ka jingpynïaid jong u Deputy Commissioner ka West Khasi Hills District, uba dei artad Chairman jong ka Committee bad ka ophis jong ka District Social Welfare Office (DSWO) Nongstoiñ, ki la ïoh ban plie ïa ka District Level Nasha Mukht Bharat Abhiyan, (0.2) campaign, West Khasi Hills, District, Nongstoiñ, ha Trysem Hall, DC’s Office ha kaba u Bah Gabriel Wahlang, MLA ka Nongstoiñ u la long kum kongsan.
Ïa kane ka campaign la sdang da ka Ministry of Social Justice & Empowerment ka Sorkar Kmie ha ka 15 tarik u Nailar 2020 ha ki 272 tylli ki District kiba la ithuh kum ki district kiba jyllei bha ha ka jingpyndonkam ïa u drok. Ka thong jong kane ka campaign ka long ban pynlong ïa ka Ri India, ka Ri kaba lait na ka jingpyndonkam ïa u drok bad ka West Khasi Hills ruh ka la shah kynthup kum ka district kaba la jyllei bha ha ka jingdih drok.
Haba kren ha kane ka sngi, u Bah Gabriel kum u kongsan u la kyntu ïa ki samla da kaba ong, “Ong Em ïa U Drok bad Hooid ïa Ka Jingim” bad kum u nongmihkhmat jong ka Nongstoiñ, u la pynpaw ba u dap da ka jingsngewkhia ban ïohi ïa ka jingkiew sted jong une u jingdih kynsha uba la pynjot ym tang ïa kiba dih hynrei, ïa ki kmie ki kpa, ki bahaïing bahasem bad ia ka imlang shalang hi baroh kawei.
“65% jong ka Ri ki dei ki samla, kiba dei ki lawei ban ïalam ïa ka ri ha ki bynta kiba pher bapher, hynrei lada ki samla ki shah ngop noh ha kum kine ki jingdih kiba sniew shano ka lawei jong ka Ri kan don,” ong u Bah Gabriel.
U Bah Gabriel u la ban jur ïa ki samla ba kin long kiba stad ban ym jied bakla ïa ka lynti, wei ba la bakla ka la shem shitom ban lait na ki ‘liewlep jong u drok.
U la buh ka jingkyntu ruh ïa baroh naduh ki nongsynshar shnong, ki nonghikai, bad baroh ban ïatreilang ban pyllait ïa ka dong ka thaiñ na u drok bad ban wanrah pat ïa ka suk ka saiñ hapoh ki ïing ki sem, ki shong ki thaw jong ka Nongstoiñ.
Ha katei ka sngi la ïoh ruh ban pyllait paidbah ïa kawei ka sur jingrwai kaba la shna bad pynbit pynbiang da u Bah Josephas Thongni bad kaba la pynmih da ka District Social Welfare Officer Nongstoiñ, ka jingrwai kaba rah ïa ka khubor ban ïalap pyrshah ïa u drok, bad ban wallam pat ïa kiba la kyrni ha ki jingdih kiba sniew sha ka jingim kaba thymmai.
U BD Marak, SP ka West Khasi Hills haba kren ha kane ka sngi u la ong ba ka West Khasi Hills ka la nang kiew ha ki kam khaïi bad dih drok kaba la buh jingma ïa ka imlang ka sahlang.
Shuh shuh, u la ïathuh ruh ba baroh ki mukotduma hapoh ka NDPS Act naduh ka 4 tarik Jylliew 2011- 4 tarik Jylliew 2025 ki long haduh 43 tylli bad napdeng kine 54 ngut la shah kem kaba kynthup ïa 53 ngut ki shynrang bad kawei ka kynthei.
U la kyntu ïa ki kmie ki kpa bad ki longïing kiba don ïa ki khun ki kti kiba kyrni dih drok ba kin ym buhrieh hynrei wan shakhmat ban ïoh ïa ki jingïarap bad pynbeit ïa ki khun ki kti jong ki bad lada ki paidbah ki lap ne shem ïa kino-kino kiba dih ne kiba khaïi drok kim dei ban tieng ne salia ban phone ha u number 112 ban pyntip sha ki pulit lyngba utei u phone number.
Ha katei ka sngi la donlang ruh u Bah HK Thabah, MCS (ADC), Kong D Pakynteiñ (DSWO) bad Member Secretary (NMDA), Dr. M Sohliya (DMHO), Dr Marweiñ, Dr. Lyngkhoi, Kong D Hujon, DSEO, Bah W Shabong CDPO, Kong D Wahlang (Theo Integrated Rehabilitation Centre) bad kiwei pat ki heh Sorkar bad ki nongtrei Sorkar na ki tnat kiba pher, ki rangbah shnong, ki khynnah skul, ki sengbhalang, Urban Mission jong ka Balang Presbyterian New Nongstoiñ lem bad kiwei kiwei.
