Shillong, Jylliew 04
Ka Kynhun Myntri ka Sorkar Jylla ha ka Sngi Balang ka la mynjur ïa ka jingtyrwa na bynta ban thied ïa 6 akar na ka 11 akar ka jaka kaba donkam ban pynheh shuh ïa ka lynti ïaid liengsuiñ jong ka Kad Liengsuiñ Shillong.
Haba kren hadien ka jingïalang, u Myntri Rangbah ka Jylla, Conrad K. Sangma u la ong, “Ngi la mynjur ïa ka jingtyrwa na bynta ban thied shuh ïa ka jaka ban pynheh ïa ka Kad Liengsuiñ Shillong.”
U la ong ba dang donkam shuh sa 11.75 akar ka jaka na bynta ban pynheh ïa ka lynti ïaid liengsuiñ – ha kaba 4.3 akar ka dei ka jaka ka tnad ïada ri katba palat 6 akar ka jaka, donkam ban thied na ki briew jong ka thaiñ.
“Kumta la thaw ïa ka komiti hapoh ka jingkhlieh jong u Deputy Commissioner, kaba la pynlong ïa ki jingïakren bad ki briew jong ka thaiñ ban pynbeit ïa ki dor bad kiwei-kiwei ki bai lutksan kiba hap ban siew. Hadien ka jingïamir jingmut bad jingïakren kaba bniah, la poi sha ka dor kaba T.72.17 klur na bynta ka bai lutksan kaba hap ban siew na bynta ka jaka, dieng, jingthung bad ïingmala ki ban sa shim ha kata ka jaka na bynta ka jingpynheh ïa ka lynti ïaid liengsuiñ,” la bynrap u Sangma.
