Shillong, Jylliew 04
Ki pulit ka jylla ki la lap ïa uwei u Khasi uba dei na ri Bangladesh, uba la rieh ha kawei ka ïing wai kaba don ha ka shnong Lawsohtun.
Katkum ka khubor na ki pulit la ong ba ha ka janmiet jong ka 2 tarik mynta u bnai, la lap ïa uwei u Khasi uba dei u nong Bangladesh uba la tip kyrteng kum u Restley Blah, 22 snem, uba na ka shnong Synrem Thymmai ha Sylhet District, Bangladesh ba u la rieh ha kawei ka ïing wai ha Lawsohtun, khlem da don ki kot ki sla kiba biang.
La ong ba kane ka ïing wai kaba don ha Lawsohtun Block-VI, ka dei jong u Raju Pohktai, 24 snem uba na ka shnong Darrang Dawki ha West Jaiñtia Hills. La ong ba kham hadien ïa une u briew la ïalam noh sha Civil Hospital Shillong na ka bynta ban leh medical check-up.
