Shillong, Jylliew 04
U Myntri Rangbah ka Jylla, Conrad K. Sangma ha ka Sngi Balang u la kular skhem ba ka Sorkar kan ïaleh katba lah bad kan ym shongthait ha ka ban wad ïa ka kurim jong u Raja Raghuvanshi (uba la shah pynïap), ka Sonam Raghuvanshi, kumjuh ban lap ïa ka jingshisha halor kaei kaba la jia bad kine ki shijur kiba na Indore, Madhya Pradesh.
“Hooid, ka long ka jingjia kaba sngewsih bad ka long kaei-kaei ka bym pat ju jia koit hapoh ka Jylla. Ka la pynkyndit ïa ngi baroh, wat ki nongshong shnong ki la kyndit, kito kiba don bynta ha ki kam jngoh kai pyrthei ruh ki la kyndit bad ka long kaei-kaei kaba ngim shym la poi pyrkhat ba kan jia,” ong u Sangma haba kren sha ki lad pathai khubor.
U la ong ba ju tip ïa ka Jylla kum ka jaka kaba pdiang sngewbha ïa ki nongjngoh kai pyrthei bad la ju pyntikna ruh ïa ka jingshngaiñ jong ki haba ki wan shane.
Haba phah ïa ka jingsngewlem bad jingburom sha ki bahaïing bahasem halor kaei kaba la jia, u Myntri Rangbah u la pyntikna sha ki bahaïing ba ka Sorkar ka la trei palat por ban pyntikna, khnang ban lap ïa ka jingshisha halor kaei kaba la jia.
“Haduh mynta, ngim pat shai kaei kaba la jia, kumno ka la jia bad ngi dang wad ruh ïa ka kurim jong uba la khlad noh. Ngi don ruh ka jingsngewkhia halor shibun kiei-kiei kiwei pat. Hynrei kumba nga ong, ym dei tang ka Sorkar bad ki pulit – ka imlang-sahlang baroh kawei ka sngewkhia halor kane namar ka long kaei-kaei kaba kongsan ïa ngi,” u la ong.
U la ban biang, “Nga pyntikna ïa ki bahaïing bahasem ba ngin ïaleh katba lah bad ngin ym shongthait ban poi sha kaba ngi thmu kumjuh ban pyntikna ban lap ïa ki jingtip ba bniah bad ba shisha ba la jia aïu bad ban pyrshang katba lah ban wad kloi ïa kaba dang jah.”
Haba ban jur ïa ka jingdonkam ban tip ïa ki jingshisha halor ka jinglong-jingman, u la ong ba ka jingshisha ka dei ban paw pyrthei, bad kumta kano-kano ka sienjam kaba donkam ban shim katkum ka jinglong-jingman, yn sa shim rai hangta.
“Mynta ka dang kloi eh ban ong kaei kaba la jia bad katno ngi tip ne ym tip namar ki dang don shibun kiei-kiei kiba dang jah haduh mynta. Kumta ka dang kloi eh ban ong kumno ngin ïaid shakhmat haba ïadei bad ka jingtohkit hynrei kumba nga la ong ba ngin ïaleh katba lah bad ngin ym shongthait bad kaei kaba donkam ban leh – ban sei madan ïa ki jingshisha bad ban pyntikna ba kito kiba donkti ha kane ka kam kin shah pynshitom katkum ka aiñ, ka Sorkar kan leh ïa kaba donkam,” u la pynskhem da kaba bynrap, “Ai ba ka jingtohkit kan bteng, ai ba ki jingshisha bad ki jingtip kin mih bad ngin sa peit kumno ban ïaid shakhmat.”
“Nga pyntikna sha ki bahaïing ba ngin leh lut katba lah…ngi la leh lypa, bad ngin ïai bteng ban leh katba lah ha ka bor jong ngi ban lap ïa ka jingshisha bad pynïoh ïa ka hok,” u la ong.
Halor ka jingdon kiba pyrshang ban ong da kumne da kumtai, u Sangma u la ong ba baroh ki tip ba ka Sohra bad ka Jylla hi baroh kawei la ju bna nam na bynta ki kam jngoh kai pyrthei.
“Ngi la leh bha ha ki kam jngoh kai pyrthei bad bun bah ki nongshang kai pyrthei kiba wan sha ka Jylla haduh mynta. Hooid, ki don ki jingtynjuh, hynrei nga tikna ba ngin sa jop ïa kine,” u la ong.
Shuh shuh u Myntri Rangbah u la ban biang ba ka Sorkar kan pynïoh ïa ka hok bad kan shim shuh ïa ki sienjam ban pynbha ïa ki rukom treikam khnang ba yn ym don shuh kiba kum kine ki jingjia hadien-habud.
