Jowai, Jylliew 04
Ki bor pynïaid district jong ka West Jaiñtia Hills ha ka Balang ki la pynkup burom ïa ka samla Sawakani Lakiang bad u Alexander Lyngdoh kiba la wanrah nam bad burom ïa ka Jylla bad ka district ha ki lympung ïalehkai kiba la kut dangshen.
Ka samla Sawakani Lakiang ka la shah pynkup burom halor ka jingkhur ïa ka takma ksiar ha ka SAARC Women’s Bikini Model Category jong ka World Fitness Federation ba la pynlong da ka South Asian Association for Regional Cooperation ha Mumbai ha ka 19 tarik u Jymmang.
Katba u samla Alexander Lyngdoh u la shah pynkup burom halor ka jingkhur khusnam ba-ar ha ka Left Hand Category bad balai ha ka Right Hand Category jong ka lympung ïalehkai Asian Arm-Wrestling Championship, 2025 kaba la long ha ka 4 tarik haduh ka 11 tarik u Jymmang 2025 ha New Delhi.
Ïa katei ka jingïalang kaba la long ha Conference Room jong ka DC ophis ha kaba la ïadon lang u Deputy Commissioner ka West Jaiñtia Hills District u Abhinav Kumar Singh (IAS), ha ka jingïadonlang ki Additional Deputy Commissioner ba kynthup ïa ka Kong B. Blah, ka Kong HML Kynta bad ka Kong DV Lyngdoh lem bad kiba haïing hasem.
Ïa kane ka jingïalang la pynïaid da u Assistant Commissioner Bah GLC Mylliem (MCS) bad la pynwai ïa ka jingïalang da ki kyntien khublei na u Bah A.I Mawrie, Research Officer Planning Branch DO Office.
