Shillong, Jylliew 04
Hadien ba la lah ban pyndep ïa baroh ki jingdonkam na ka bynta ki khynnah, ka shlem treikam jong ka District Sports Officer (DSO) East Jaiñtia Hills ka la sdang ïa ka lympung ïalehkai District Level Inter School Subroto Cup Football Tournament 2025 ha ka Sngi Balang.
Ïa kane ka lympung la pynlong ha madan ïalehkai jong ka East Jaiñtia District Sports Association ha Deinchynrum, Khliehriat kaba la bynta ha la ki jong ki kyrdan ïalehkai kum ka Under-15 ki shynrang bad ka Under-17 jong ki shynrang bad kynthei.
Ki skul kiba la wan shim bynta baroh ki don 47 tylli. Ha ka Under-17 (boys) ki don 20 tylli bad 14 tylli ha ka Under-17 (girls), katba 13 tylli ha ka Under-15 (boys).
Ha ka jingïalehkai jong ka Under-17 (boys), ka Khliehriat HSS ka la pynliem noh ïa ka Rymbai Presbyterian HSS lyngba ka tie-breaker da 4-3 kol, kumjuh ka Step by Step SS ka la jop ïa ka Ambrose Memorial SS lyngba ka shi kol ba la thep da u Shanmei Rymbai ha ka minit kaba 55. Ka Sham Sham SS ka la shah rem noh ha ka Musniang SS lyngba ka shi kol ba la thep da u Emlangmi Dkhar ha ka minit kaba 49.
Haba phai sha ka Under-15 (boys), ka Sham Sham SS ka la pynliem noh ïa ka Khliehriat HSS da 1-0 kol bad ka Musniang SS ka la jop da 1-0 kol ïa ka Step by Step SS.
Ïa kane ka lympung yn biang ha ka Sngi Palei na ka bynta ban ïaknieh rah ïa ka nam lahduh bad ban mihkhmat ïa kane ka district sha ka State Level Subroto Cup ka ban sa long shen ha kane ka nongbah.
