Guwahati, Jylliew:
Ki la don palat 5.15 lak ngut ki briew ha kylleng 22 tylli ki distrik ki la shah ktah katba ka Assam ka dang ïakhun pyrshah ïa ka jingshlei um kaba nyngkong.
Ka jylla, ka la ïathuh ba la don sa uwei u briew uba ïap ha ka Lah Sngi U Blei kaba la pynkiew ïa ka jingdon jong ki baïap na ka jingshlei um sha ki 38 ngut, ha kaba 11 ngut ha Assam, 9 ngut ha Arunachal Pradesh, mar 6 ngut ha Meghalaya bad Mizoram, 3 ngut ha Sikkim, 2 ngut ha Tripura bad uwei ha Nagaland. Ka thaiñ baroh kawei ka la shah ktah ha ka jingshlei um bad ka jingtwa khyndew, kaba la pynmih da u slap ba khlem sangeh.
Katkum ka Flood Bulletin ba la pynmih da ka sorkar Assam, ki la shah ktah haduh 5,15,039 ngut ki briew bad ki jaka rep ha ki jaka ba heh 12,610.27 hectare. Palat 1.85 lak ngut ki briew ki sah ha ki jaka sah ba shipor ne ha ki jaka ba la buh ban ai jingïarap.
Ka wah Brahmaputra bad katto katne ki shnat wah jong ka ki la tuid palat ïa ka dak ba don jingma ha ki katto katne ki jaka. Ka Lakhimpur, Cachar, Hailakandi bad Sribhumi ki dei napdeng ki distrik kiba la shah ktah jur bha. Ka tnat peit mariang jong ka Ri India (IMD) ka ïathuh ba kan don ka jinghap slap kaba jur haduh kaba jur bha ha ki katto katne ki jaka bad ka jinghap slap kaba jem ha kiba bun ki jaka jong ka Assam ha kine ki 24 kynta ban wan.
U Myntri Rangbah ka jylla u Himanta Biswa Sarma ha ka lah sngi U Blei u la jurip ïa ka jinglong jingman jong ka jingshlei um ha Lakhimpur. U la pynthikna ba ka sorkar kan shimkhia ïa ki briew jong ka jylla kiba shah ktah.
“Ki khaw rashon, ki kot ki sla, ki jaiñ ki nep, ki tiar shet, ki jingthoh ba shu copy, bad man ki tiar pyndonkam kiba bun jait yn sa pynbiang da ngi bad hadien ba la hiar ka jingshlei um, ngin sa shna biang ruh ïa ki ïing ki sem jong ki,” u la pynthikna lyngba ka jingthoh ha ka rynsan X. Ki briew ki pyndonkam ïa ka lieng ban leit sha ki jaka ba kham shngaiñ hadien ba u slap u la jur bha u la wanrah ïa ka jingshlei um, ha Nagaon, ha ka lah sngi U Blei, 2 tarik, Jylliew, 2025.
Ka jingshlei um ha Manipur ka la ktah haduh 20 hajar ngut ki briew. U slap uba bteng ryngkat bad ki wah kiba tuid bad ki jingtwa ha ki thliew ki la pynshlei ïa ki jaka ba heh jong ka them Imphal.
Ki tyllong khubor ba thikna ki ïathuh ba ki don 3,365 tylli ki ïing kiba la shah pynjulor. Ka sorkar ka la buh haduh 31 tylli ki ktem ai jingïarap ha Imphal East distrik. Ka Senapati distrik ka la shah pynkhihwin hapoh ka jingshlei um kaba jur bha. Khyndiat spah ngut ki briew kiba shah ktah hangta ki dang rieh ha ki jaka sah ba shipor.
Ha Nagaland, ka jingtwa khyndew kaba jur ha shi lynter jong ka surok National Highway-2, ka la pynthut ïa ka leit ka wan hapdeng ka Nagaland bad Manipur. Kane ka jingjia ka la jia hajan ka shnong Naga Heritage Kisama.
Ha Tripura, ka IMD ka la pynmih ïa ka jingmaham ba la dei ban pynkhreh na ka jinghap jong u slap uba jur ha ki bynta jong ka Khowai, West bad South Tripura distrik bad ka jingpynbna ba la dei ban long kiba husiar na ka bynta kiwei pat ki phra tylli ki distrik haduh ka step jong ka sngi Ba-ar.
