London, Jylliew:
Ka ri Bilat, ha ka Sngi Balang ka la kular ban pynpoi 1,00,000 tylli ki drone sha Ukraine ha kaba kut jong kane ka snem mang tyngka na ka bynta u Iaiong 2026, hadien ba ka la ong ba ki liengsuiñ khlem briew lane ki ‘drone’ ki la pynkylla ia ka rukom ïakhun thma.
Ka sorkar ha ka Sngi Nyngkong ka la kyrshan ia ka Strategic Defense Review kaba la pynmih da ki riew shimet, kaba khot ia ka kynhun shipai kaba kham tbit, kaba la pyniaid da ka teknoloji ban ialeh pyrshah ia ki jingma kiba wan mih kynsan, kynthup ia ka jingleit thombor jong ka Russia kaba lah ban jia kynsan-kynsan ha ka por ka bym poi pyrkhat.
Ka Britain, kawei na ki nongkyrshan ba radbah jong ka Ukraine, ka thmu ban ïoh jinghikai na ka jingïakhun jong ka Kyiv, kaba la neh palat lai snem pyrshah ïa ka jingwan hiar thma jong ka Russia, ha kaba ki drone, ki la pynkylla dur ïa ka madan thma.
Kane ka mang tyngka na ka bynta ki drone kaba shongdor 350 Million Pound ($473 Million Dollar) ka dei ka bynta jong ka jingthmu ban pynkhlaiñ shuh shuh ia ka tnat shipai kumba 4.5 Billion Pound na ka bynta ka Ukraine.
U Secretary ka tnat Pohiing, John Healey un pynbna ïa kane ha ka jingïalang jong 50 tylli ki ri jong ka Ukraine Defence Contact Group ha Brussels, kaba la pynlong lang bad ka Germany.
Nalor ki jingpynpoi da ki drone, ka Britain ka la ong ba ka la pyndep ïa ka jingshalan ïa ki 140 hajar tylli ki ‘namding sha ka Ukraine naduh u bnai Kyllalyngkot bad kan pynlut ruh sa kumba 247 Million Pound mynta u snem ban ai jinghikai ïa ki shipai Ukraine.
