Shillong Jylliew 05
Ka Krishi Vigyan Kendra (KVK) West Khasi Hills, Nongshillong ha ryngkat ka Ri baroh kawei ka la pynlong ïa ka Viksit Krishi Sankalp Abhiyan (VKSA) ka jingïalap (Campaign) halor ka rep ka riang na ka bynta ki nongrep ha ka 5 tarik Jylliew 2025, kata ha ka sngi kaba hynñiew naduh ba plie paidbah ha ka 29 tarik Jymmang, 2025.
Ha kane ka sngi ka ophis ka la pynlong ïa ka jingïalap sha khyndai tylli ki shnong kiba hap hapoh ka Mawthadraishan bad Mawshynrut C&RD Blocks jong ka Eastern West Khasi Hills bad West Khasi Hills District.
Kine ki shnong ki kynthup ïa ka Mawlangsu, New Mawlangsu, Domkohmen, Khyllemsangrin, Kriangrin, Umwali, Umwahlang, Nonglang bad Kyndongei.
Kum shibynta jong kane ka jingïalap paidbah, lai tylli ki kynhun kiba kynthup ïa ki Scientists na ICAR, CAU and KVK, ki Ophisar na ki Department of Agriculture & Farmer’s Welfare, Animal Husbandry & Veterinary Department, Department of Fisheries lem bad ki dkhot ka FPO ki la mih ban leit sha la ki shnong kumba la pynbeit.
La ai ïa ki halor Ka VKSA Pre- Kharif campaign, ka Rukom rep da ka Integrated Farming System (IFS) bad ki jingtip halor ka kam ri dohkha, Ka rukom rep khlem dawai (Organic farming), natural farming bad ka jingdonkam ban bud ïa kine, ka rukom ai sboh dawai kat ban biang ban ïoh khambun ka jingmih bad pynduna ïa ka jingktah ïa ka mariang, ka rukom pyndonkam ïa ki biofertizer and biopesticides- ki dawai sboh, dawai khniang bad jingpang jong ki jingthung ki bym ktah ïa ka mariang, ka jingdonkam ban test ïa ka khyndew, ka jingdonkam ïa ki nutrition garden & kitchen garden nalor kiwei kiwei de.
Kawei ka jingkyrpang jong ka VKSA ka long ka jingïakynduh markhmat hapdeng ki stad wadbniah ka rep ka riang bad ki nongrep da ka jingthmu ban pyniasoh bad pynpoi ïa ki rukom rep bathymmai sha ki kper jong ki nongrep.
“Lyngba kane, la btin lynti ïa ki nongrep ha kiba bun ki liang bad ki stad wadbniah kin rah ïa ki jingeh bad jingai jingmut jong ki nongrep khnang ban pynbha shuh shuh ia ka rep ka riang”.
Ha kane ka sngi la sam ruh ïa ki kot lyngkdop halor ka Natural Farming, Nutri Cereals, ki symbai kba bad reiwhadem bathymmai, ki tunnel polyhouse ba duna jinglut, ki kynja top ba dait thah jong ka AAU (Low-cost evaporative cool structure), ka machine kti ba ot shynrai, ki jait syiar Kalinga brown bad White Pekin, u jait sniang “Lumsniang”, kaba ri dohkha ha pynthor kba, bad kiwei kiwei.
Nalor kata la sam ruh ïa ki symbai jhur sha ki nongrep jong kine khyndai tylli ki shnong.
