Shillong, Jylliew 05
Ka lympung ïalehkai District Level Inter School Subroto Cup Football Tournament 2025 ba la pynïaid da ka shlem treikam jong ka District Sports Officer (DSO) East Jaiñtia Hills ka la nangjam shaphrang ha ka sngi kaba ar ha madan Deinchynrum, Khliehriat.
Ha ka jingïalehkai Under-17 ki shynrang, ka Byndihati SS ka la pynliem noh ïa ka Seiñraij Jalaphet SS lyngba ka tie-breaker da 4-2 kol. Kumjuh, ka Little Star SS ka la jop da 3-0 kol ïa ka Rymbai Govt. SS. Ïa kine kol la thep da u Ambition Dkhar (38), H. Rymbai (56) bad u Fastly Dkhar (60).
Ka Sarawati Vidya Mandir ka la shah rem noh ha ka Sanshnong SS da 4-0 kol. U Phrangki Sana u la thep ar kol ha ka minit kaba (36 & 42), katba ïa kiwei pat la thep da u Synsharwami Dkhar ha ka minit kaba 11 & 63.
Haba phai sha ki jingïakhun jong ki kynthei (U-17), ka Khliehriat HSS ka la pynliem noh ïa ka Rymbai Govt SS lyngba ka shi kol ba la thep da ka Melody Rymbai ha ka minir kaba 14.
Ka Dkhiah East SS ka la shah rem noh da 0-3 kol ha ka Sanshnong SS. Ka Thehlut ka la thep ar kol ha ka minit kaba 13 & 29 bad kawei pat la thep da ka Theirisa (25).
