Shillong, Jylliew 05
U Rakkam A Sangma, Myntri ka tnad pule-puthi ha ka Sngi Palei, ka 05 tarik Jylliew u la ong, ba ka sorkar ka dang don mynta ha ka jingpynkhreh ban pynlong ïa ka jingïamir jingmut na ka bynta ban pynlong salonsar lang kumjuh ïa baroh ki skul bad kolej deficit kiba don ha kylleng jong ka jylla.
Ha ka jingïakren bad ki lad pathai khubor, u Rakkam u la ong, ka sorkar ka la wanrah mynta da ka Meghalaya Education Grant (MEG) bad ïa mynta ngi dang don ha ka jingpynkhreh ban pynlong shwa da ka jingïamir jingmut bad ki bor pynïaid jong baroh ki jaka pule ba hap ha ka thup Deficit naba ka sorkar jylla ka thmu ban shimti ne ban pynlong salonsar noh ïa baroh na ki.
Katkum ka jingong jong u Rakkam, ba mynta ka jylla ka don haduh 13 jait ki kynhun nonghikai skul bad 4-5 jait ki kynhun jong ki nonghikai kolej.
Da kaba u la pynpaw, ba ka jingthmu ka long ban pynbeit ryntih ïa ka tnad pule-puthi, u Myntri u la ong, “Ngi kwah ban don la kumno-kumno tang lai jait ki kynhun nonghikai, kata ka long ki nonghikai sorkar, ki bym dei sorkar bad ki nonghikai skul shimet.”
U Myntri u la ong ruh ba, “Bun ki jaka pule kin ym mynjur bad bun ki jaka pule kin sngewbha eh ban long ki jaka pule sorkar. Kumta ngi don ïa kane ka jingïamir jingmut ban tip la kine ki jaka pule ba hap ha ka thup Deficit kin ai ne kin ym ai ïa ka jingmynjur.”
Nalor kane, u Myntri u la ïathuh ba un ïakynduh lang ïa ki MLA ha ka Sngi Thohdieng ban ïasyllok haba ïadei bad katei ka jingtyrwa na ka sorkar jylla.
Ka jingtyrwa kaba nyngkong eh ka long ba ka sorkar ka dang pynkhreh ban shimti ne pynlong salonsar ïa baroh ki jaka pule kiba hap ha ka thup Deficit naduh ki kolej haduh ki skul primary namar ki la don lypa ki kam ba la dep mang,” la ong u Myntri da kaba bynrap, “Ka don ka jingeh namar ki bor pynïaid jong kita ki jaka pule ki lah ban ym mynjur hynrei na bynta kito ki bym mynjur, ka rukom ai pisa jong ka sorkar kan long kaba kham pher.”
Haba kylli, u Myntri u la ong, ba ka sorkar jylla ka lah ban pynlut tam sa T.30-40 klur na ka bynta ban pynlong salonsar ïa ki jaka pule Deficit. Kane kan ïarap haduh katta-katta ban pynhiar ïa ka rukom siew bai klas kaba ju shim baroh shi katta ha ki skul Deficit.
U Myntri u la ai nuksa ruh da kaba ong, “Ha ka Shillong College, ki don 71 tylli ki kam hikai ba la siew da ka sorkar. Ka bai klas ba la shim mynta da ka kolej ka long T.60,000 hynrei lada kane ka kolej ka kylla long noh ka kolej sorkar, ka rukom siew bai klas kan ym poi eh tang kumba T.15,000.”
Shuh shuh, u Myntri u la pyntip ba ka sorkar ka pynlut haduh 2000 klur tyngka ha ka tulop jong ki nonghikai man la u snem.
“Na kane, ngi pynlut T.927 klur na ka bynta ban siew tulop sha palat 17289 ngut ki nonghikai skul deficit bad adhoc, T.366 klur na ka bynta 14,666 ngut ki nonghikai SSA bad T.216 klur na ka bynta 1399 ngut ki nonghikai kolej bad kiwei kiwei,” u la ong.
