Kohima, Jylliew:
Ki pulit jong ka Nagaland ki la pynshai ba ki briew jong ki kim don bor ban daiñ kuna ïa ki jingpynkheiñ kiba ïadei bad ka Inner Line Permit (ILP) system ha ka jylla. Katkum ka jingpynbna ba la pynmih da ka tnad ba dei khmih mynta ka sngi, la ong ba dei tang ki Majistor kiba donbor katkum ka aiñ ki ban lah ban pynshitom ïa ki briew kiba lap ba kim don ïa ki kot ki sla ILP kiba biang.
Kane ka jingpynshai ka wan hapdeng ka jingpyntreikam ïa ka rukom peit bniah ïa ka ILP ha baroh kawei ka jylla, kynthup ïa ki distrik jong ka Dimapur, Chümoükedima, bad Niuland, ha kaba dang shen la pynjlan shuh shuh ïa ka rukom peit bniah ïa ka ILP. Ki pulit ki la pynpaw ba yn pynlong ïa ka jingpeit bniah ïa ka ILP “na ka por sha ka por,” hynrei ha kano kano ka rukom ym shah ïa ki pulit ban lum kuna.
“Lada lap ïa kino-kino ki pulit ba ki leh ïa kum kine ki kam, ïa kajuh lah ban ujor sha ki heh ophisar,” ong ka kyrwoh, da kaba pynksan ïa ka jingdonkam ban pynneh ïa ka jinglong khuid bad ban bud ryntih ïa ki pud ki sam jong ka aiñ katba dang pyntreikam ïa ki kyndon jong ka ILP.
Ha ka rai ha u bnai ba la lah, ka sorkar Nagaland ka la pynbna ban pyntreikam ïa ka rukom treikam ILP ha baroh kawei ka jylla, da kaba pynlong ïa ka ban long kaba donkam wat ha ki distrik kiba la shah pyllait mynshwa. Shuh shuh, naduh ka 1 tarik u Kyllalyngkot, 2025, ïa ka rukom aplai bad ai ïa ka ILP la leh beit lyngba ka online, ha kaba la pynsangeh noh ïa ka rukom treikam offline.
Ki nongaplai ki lah ban aplai ïa ki ILP lyngba ka official portal: https://ilp.nagaland.gov.in. Na ka bynta ka jingïarap, ki riew shimet ki lah ban phone ha kine ki number jingïarap: 7085065056 lane 03862-225519.
Ka Inner Line Permit ka dei ka rukom pynbeit aiñ kaba la pyntreikam hapoh ka Bengal Eastern Frontier Regulation, 1873, kaba thmu ban buddien ia ka jingrung bad sah jong ki briew ki bym dei ki trai ri trai muluk ha ki katto katne ki jylla ba Shatei-lam-Mihngi.
Ki bor pynïaid ki la kyntu ïa ki paidbah ba kin tip ïa ki hok bad ki jingkitkhlieh jong ki katkum ka aiñ ILP bad ban pyntip ïa kano kano ka jingjia ba la pynshitom beiñ khlem jingbit da ki pulit.
