Shillong, 06 Jylliew
Ka Dorbar Shnong Jatah Nonglyer ha ka Sngi Thohdieng, ka 06 tarik Jylliew 2025, ka la shim ïa ka rai ban pyrshah bad khang ïa kino-kino kiba khrong pisa na ki nongïew hapoh ka ïew Jatah.
Kane ka jingshim rai ka shnong Jatah Nonglyer ka dei namar ba kane ka ïew ka don hapdeng ka jingbym ïa sngewthuh jingmut jong ka Raid Lynshing bad ka shnong Jatah Nonglyer.
Haba kren ha kane ka sngi na ka liang u Secretary ka Jatah Nonglyer, u la pyntip ba ïa kane ka ïew yn plie beit kumba ka ju long, hynrei ha kaba ïadei bad ka bai khrong na ki nongïew ngin ym pat shah bad pyrshah lada don kino-kino kiba wan ban khrong ha katei ka ïew.
U la kyrpad ïa ki nongïew nonghat kiba wan ha kane ka ïew ba kim bit ban ai ïa ka bai ïew, kat bym pat wan ka jingïapynbeit ne ka jingpynbna da kumwei pat, namar ka kynrum-kynram ka dang don mynta haba ïadei bad kane ka ïew hapdeng jong ngi ki trai jaka trai shnong bad ka Raid Lynshing.
Shuh shuh, u la kyrpad ruh ïa ki paidbah ba kin sngewbha ban ïatreilang bad ka shnong Jatah Nonglyer, ba kim dei ban ai ïa ka bai ïew kum ka jingkwah ban ïa pynbeit namar khlem ka jingïapynbeit bad bym ïa sngewthuh lang hapdeng ka shnong bad ka raid, kan wanrah shibun ki jingeh bad ki kynrum-kynram.
