Jowai, Jylliew 06
Ka Jaiñtia Students Union (JSU) Shillong Circle ha ka Sngi Thoh-dieng ka la leit ïakynduh ïa u Commissioner & Secretary, Vijay Kumar Mantri ban kyntu ba un ïakren bad ka sorkar kumjuh bad ka National Testing Agency na ka bynta ban buh ïa ka jaka thoh eksam Common University Entrance Test (CUET) ha Jowai, West Jaiñtia Hills.
Na ka liang u Adviser jong ka Seng, A Suchiang, u la ong ba kumba ka long mynta, kiba bun ki samla pule na Rilum Jaiñtia ki la hap ban leit sha ki jaka kiba jngai kum sha ka nongbah Shillong lane sha kiwei pat ki Centre kiba jngai ban ïaleh ïa ka eksam CUET.
U la ong ba kane ka la buh jingeh shibun ïa ki samla kiba kwah ban ïakhun ïa kane ka eksam CUET namar ka jingjngai ha ka leit ka wan namar ki la hap ban mih na la ïing naduh dang step phyrngab bad wanphai ïing haduh ka por janmiet kaba wanrah ka jingkhuslai bad ka jingtlot jingswai khamtam ha kaba ïadei bad kum kine ki eksam kiba kongsan bha.
Nalor kata, u la ong ba ka jingdheng kali ha ka nongbah Shillong ka dei sa kawei pat ka jingeh na ka bynta ki samla pule ha kaba bun na ki samla ki la mad jingeh namar ka jingpoi slem sha ki jaka thoh eksam.
Kawei pat ka jingeh ka long ruh khamtam ïa kito ki samla pule ka thaiñ kiba wan na ki longïing kiba duna ha ka liang ka ïoh ka kot namar ki hap ban pynlut bun ka pisa na ka bynta ka leit ka wan, ka bam ka dih bad ha ki khep wat ki jaka sah lada ki jaka thoh eksam ki dei kiba kham jngai.
Une u nongïalam ka seng u la pyntip ruh ba ha kane ka jingïakynduh, na ka liang u Commissioner & Secretary u la kular ba un sa phah ïa ki ophisar ba kin jurip ïa ki katto-katne ki jaka pule ne kino-kino ki centre na ka bynta ban buh ïa kine ki jaka thoh eksam CUET ha Rilum Jaiñtia.
“Na ka liang ka JSU ngi long kiba kloi ban ïatreilang bad ka sorkar bad ban ai ïa kino-kino ki jingïarap na ka bynta ban pynthikna na ka bynta ka jinglah ban thaw ïa kine ki centre thoh eksam CUET ha Jowai na ka bynta ka jingmynroi jong ki samla pule ka thaiñ,” bynrap u Adviser ka seng.
