Shillong, Jylliew 06
Ka Assam Rifles Public School bad ka Tyrsad Higher Secondary School ki la long kum lahduh ha ka Under-15 (shynrang) bad Under-17 (kynthei) jong ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills District.
Ha ka jingïakhun final jong ka Under-15 (shynrang) kaba ka long ha ka Sngi Thohdieng ha madan Heh Mini Stadium kaba ha Mawlai Phudmuri, ka Assam Rifles ka la lah ban pynliem noh ïa ka O. M. Roy Memorial Higher Secondary School lyngba ka tie-breaker da 4-3 kol.
Kane ka jingïakhun kaba la long kaba itynnad bad kaba ïakhaid bha namar baroh ar kynhun ki la pyrshang ban ïakhun tyngeh naduh kaba sdang. Kane ka jingïakhun ka la pynkyndeh ïa ki nongkyrshan jong baroh ar tylli ki kynhun namar ka jingïalehkai bha ki khynnah na baroh arliang mamla.
Ka Assam Rifles ka la ïoh ban pynkhih jar nyngkong eh lyngba ka free-kick na u Irungbam Yaiphaba Meitei ha ka minit kaba 29. Hynrei tang hadien 4 minit ka O.M. Roy ka la lah ban pynphai kylla lyngba u Aibankhraw Kurbah, uba la ïoh ban shut na jngai ha kaba u rangapkol ka liang pyrshah um shym la lah ban kyrda na ka jingshah thep.
Lyngba kane ka jinglah ban pynïakhaid ka la pynlong ïa kane ka jingïakhun ban nang kham itynnad shuh shuh namar baroh ar kynhun ki la sdang ban ïakhun tyngeh hynrei kim shym la lah ban thep kol shuh. Pynban wat haba la ailad ba kin bteng sha ka ‘extra time’ kaba mar 7 minit kim shym la lah ban ïoh thep kol bad dei ha ka jingïashut tie-breaker ba ka Assam Rifles ka la lah ban pynurlong syndon ïa ka nam lahduh.
Haba phai sha ka jingïakhun final jong ka Under-17 (kynthei), ka Tyrsad Higher Secondary School ka la lah ban pynliem noh ïa ka Sacred Heart Boys Higher Secondary School da 1-0 kol. Ïa kane ka shi kol la thep da ka Wanrihun Kharnaïor ha ka minit kaba 47.
Te, ka Assam Rifles Public School bad ka Tyrsad Higher Secondary School kin mihkhmat ïa kane ka district sha ka State Level Inter School Subroto Cup Football Tournament 2025 ka ban sa long shen ha kane ka nongbah.
Ïa ki khusnam sha kitei ki kynhun la sam da u Principal ka Tyrsad Higher Secondary School, Bah Dilipstar Rani lem bad u khlur ïalehkai ka Jylla u Allen Camper Nongbri bad uba dangïalehkai mynta na ka Bengaluru United ryngkat ki nongpynïaid na ka shlem treikam u District Sports Officer (DSO) East Khasi Hills District.
Ïa ka nam Best Goalkeeper ha ka U-17 Girls la ïohpdiang da ka Mercy Lina Umdor bad ka Balabet Khongsit ka la ïohpdiang ïa ka Player of the Tournament. Katba ha ka U-15 (shynrang) u Lazarus Pohthmi u la ïohpdiang ïa ka nam Player of Tournament bad u Alvin Joe Kharsahnoh kum Best Goalkeeper.
