Shillong, Jylliew 06
U hynmen jong ka Sonam Raghuvanshi u Govind Raghuvanshi u suba ba ka para jong u ka lah ban shah rahbor ha ki runar namar kat haduh mynta ym pat lapdien ïa ka haba ki Pulit, NDRF, SDRF, Emergency & Fire Services ki la leit wad biang ha ka Sngi Thohdieng ka 6 tarik u Jylliew 2025.
Ha ka jingïakren bad ki nongthoh khubor ha ka 5 tarik u Jylliew ha Wei Sawdong, u Govind u mutdur beit ba ka para jong u (Sonam) ka dang im namar bym lap haba la wad ïa ka haduh ka Sngi Thohdieng.
Ka jingdon jingkyrmen u Govind ba ka Sonam ka dang im ka dei namar ba ki pulit kim lap eiei haba ki la hiar bun sien sha ka riat ba la lap ïa ka met u Raja Raghuvanshi.
Ka jingkylli mynta ka mih na kiba bun ‘riew paidbah, shaei ka Sonam ka don? La ka la shah rahbor shisha kumba suba u hynmen ne ka la shah pynïap bad la bret ïa ka sha kawei ka jaka?
Ka jingkylli mynta ka mih ruh lada shah pynïap baroh ar ngut, balei la lap tang ïa u shynrang bad ban bret ïa ka met ha ka riat Wei Sawdong?
Nalor katta, kaba pynsah umdum ïa ki pulit bad ïa ki paidbah jong ka thaiñ Sohra ba kumno ïa ka scooty la wan pynïeng ha Sohrarim bad mano ba ñiah ïa ka.
Shuh shuh, na ka liang u Bah Alan West Kharkongor uba dei u nongaibuit ka Hima Sohra haba ïa dei bad ki kam jngohkai pyrthei, u la ong ba lada ïa ka jaka ïeng kali ha Wei Sawdong la plie imat kan ym jia ka jingsngewsih ïa kine shikurim.
Ka jaka ïeng kali ha Wei Sawdong ka long shisha kaba kynjah naduh ba la khang ïa ka namar ka don ka riat kaba jylliew bad sawa tang ka um bad wan kah u lyoh dum lada dei ka por ba mih sngi.
Kat haduh ka Sngi Thohdieng, ki pulit NDRF, SDRF ki dang bteng ban wad sa ïa ka Sonam ha ki bynta kshaid jong ka Wei Sawdong kaba dei ka jaka kaba kynjah naduh ba la khang ban rung ïa ki nongjngohkai pyrthei hadien ba ka don ka jingïaknieh jaka.
Haba ki pulit kim shym la lapdien eiei, kumta ha ka por janmiet ki la ïaid da ka kjat naduh Laitduh ter ter ban bud ïa ka surok hynrei namar ba la kem dum sa ka bneng ki la sangeh noh bad bteng biang lashai ka sngi.
