Nongstoiñ, Jylliew 06
Ka kynhun jong ki pulit ka Nongstoiñ ha ryngkat ka Anti-Narcotic Task Force (ANTF) hadien ka jingïoh jingtip lyngba ki tyllong khubor ba thikna, ha ka miet jong ka 5 tarik u bnai Jylliew 2025 ki la pynlong ïa ka jingpynap shrip ha Nongstoiñ bad ban ïoh kem noh ïa uwei u briew uba la suba jur ba u dei u nongkhaïi drok.
Katkum ka kyrwoh khubor na u Superintendent of Police ka West Khasi Hills la pynpaw ba ïa utei uba la shah kem la tip kyrteng kum u Teiborlin Mawlot (37 snem), uba dei na ka shnong Mawkaton West Khasi Hills bad uba sah pat mynta ha Them Ïew, Nongstoiñ.
Shuh shuh la ong ruh ba ki pulit ki la buddien bha ïa une u briew hadien ba ki la ïoh jingtip ba u donkti ha ka jingdie drok.
Ka khubor na u SP ka ong ruh ba ki pulit ki la ïoh ban bat ïa une u briew ha ka por ba u dang shong ha ka kali paidbah kaba don ïa ka nombor ML06-8004, ha surok Nongstoiñ-Shillong, hajan ka Indian Oil Petrol Pump, Upper- New Nongstoiñ.
La ong ruh ba ki pulit ki la buh da ka Mobile Check Post (MCP) ha katei ka jaka bad la pynlong ïa ka jingtalasi ïa ka kali ba u shong ha ka jingïadonlang ki sakhi.
U SP ha ka kyrwoh khubor u la ïathuh ruh ba ha ka jingtalasi ïa ka met jong utei u briew, ki pulit ki la ïoh ban kurup 7.79 gram u drok heroin, 21 tylli ki tyndong, kawei ka mobile phone, kawei ka pisa 500, bad kawei ka lut `10. Nangta, ka khubor na u SP ka ong ruh ba la shimti noh ïa utei u briew bad baroh ki tiar kiba la ïoh kurup, bad la register ïa ka case hapoh ka Narcotic Drugs and Psychotropic Substances (NDPS) Act.
Shuh shuh ki pulit ki la ïathuh ba ka jingtohkit kaba bniah halor kane ka kam ka dang ïaid shakhmat.
