Shillong, 06 Jylliew
Hadien kumba katto-katne sngi ka jingkhlad noh jong kawei ka longkmie armet kaba la ithuh kyrteng ka Kong Pynchei Bareh, 38 snem ka rta ha Maternity and Child Hospital (M&CH) kaba don ha Panaliar, Jowai, kaba la mih na ka jingkynnoh ba ka jingkhlad noh jong katei ka longkmie armet ka dei namar ka jingbym shimkhia ki bor pynïaid jong katei ka hospital.
Na ka liang ki doktor ka Directorate of Health Services (DHS) – Research and Education ha ka Sngi Thohdieng, ka 6 tarik u Jylliew, 2025, ki la mih shakhmat ban ai jingpynshai haba ïadei bad kane.
Haba ïakren bad ki lad pathai khubor, ka Dr. N. E Kharsahnoh, Director ka M&CH, ka la pyntip ba ha ka jingwan poi katei ka longkmie sha katei ka hospital ka dang don ha ka met kaba koit ba khiah bad na ka liang ki doktor ruh ki la leh ïa kaba donkam ban ai ka jingsumar kaba biang na ka bynta jong i.
Ka la ïathuh ba dei ha ka 4 tarik ha ka por kumba 6:20 kane ka longkmie armet ka la sdang ban ud suh namar ha ka por ba itei i longkmie i wan nyngkong im pat ud suh. Kumta na ka liang ki bahaïing bahasem jong katei ka longkmie ruh ki la pan ban rah noh sha kawei ka hospital ban sumar, hynrei na ka liang ka hospital ki hap ban pyndep ïa ki kamram baroh ban pynbiang ïa ki kot ki sla bad ka shimpor ïa ki ban pyndep bad kumta namar ba kane ka longkmie ka la jur palat ka jingsuh ka la khlad noh ha ka por 9:30 eiei janmiet.
Nangta ka la ong ruh ba kane kam dei ka por ban ïa kynnoh iwei-ïa-iwei, hynrei ha kaba kum kane ka jingjia kum ki doktor ngin peit ban lap ïa kiba donkti ha kane ka kam trei torti.
“Kum ka tnat ka shim ïa kane ka jingkitkhlieh ban ai ka jingsumar kaba paka la ka long ïa ki longkmie, ki rangbah bad ïa baroh khnang ba kum kine ki jingjia kin ym wan jia shuh nangne shakhmat,” ong ka Dr. Kharsahnoh.
Haba bynrap pat na ka liang ka Dr. W. Shangpliang, ka la pyntip ba ka jingkhlad noh jong kane ka longkmie armet ha katei ka miet, ka dei namar ka jingpait jong ka pla khun na bynta ba shadien.
Ka la ïathuh ba ka jingshem jong ki doktor ba katei ka longkmie armet ka la pait ka pla khun ka dei hadien ba katei ka longkmie ka la khlad. Kumta ki la thmu ban ïarap sei noh ïa i khunlung napoh kpoh bad la shem ba ka pla khun ka la pait hapoh kpoh kaba dei na ki bynta ba shadien kaba lam sha ka jingkhlad noh jong katei ka longkmie.
Haba kylli pat, hato ka la ju don ne em kiba kum kane ka jingjia? Ka Dr. Shangpliang ka la ong, kum kane ka jingjia pait ka pla khun ha ka por ba armet ka kham ñiar. Bunsien hi lada ngim lap kum kine ki jingjia ka dei beit tang ha ki longkmie kiba la shah puid teng ha ka pla khun bad kiba la suh kha slem slem, ki bym lah ban kha.
Haba bynrap pat na ka liang ka Dr. L Mylliem Umlong ka la ong, ba ïa katei ka longkmie ba armet la phah na Sutnga ban leit shah sumar noh sha Panaliar bad katei ka longkmie kadei ba ka don ka jingduna um hapoh ka pla khun. Kane ka longkmie ka dei kaba ju kha khun beit ha ïing, bad ki doktor ki la ailad ïa kane ka longkmie ba kan kha ha hospital namar ba ka la wan ha hospital, hynrei ka la jia noh kaba sngewsih ba katei ka longkmie ka la khlad noh na sla pyrthei.
“Bad hadien ba la lap ba kane ka longkmie ka don ha ka jingpait ha ka pla khun ha ki bynta nadien, kata kadei kaba ngi nang ïai wad bad wad bniah, bad hadien ngi lah ruh ban kylli na ki bahaïing bahasem ïoh kane ka longkmie ka don ka jingur jinghap kaba la jia pait ka pla khun hapoh kpoh,” ong ka Dr. Mylliem Umlong.
Shuh shuh, ka la ïathuh ba kum kine ki jingjia pait ka pla khun ngi ju shem beit tang ha ki longkmie kiba la kham bun khun.
