Shillong, Jylliew 06
U Working President ka United Democratic Party (UDP), Bah Titosstarwell Chyne u la ïathuh ba ka seng ka la rai ban ïashimbynta ha ka All Party Committee (APC) ban ïakren halor ka jingthmu jong ka Sorkar ban pan ïa ka jingmut na ki nongïalam jong ki seng saiñ pyrthei halor ka jingthmu ban wanrah ïa ka lynti rel.
Haba kren sha ki lad pathai khubor, u Bah Titos u la ong ba ka seng ka la jied ïa ki ar ngut nongïalam na ka seng ban mihkhmat sha ka jingïalang jong ka All Party Committee kiba kynthup ïa u bad ïa u Bah Lahkmen Rymbui.
U la ïathuh ruh ba ha shuwa ba ki nongïalam ka seng kin leit sha kane ka jingïalang, kan don shwa ka jingïasyllok ban pan jingmut na baroh ki MLA, MDC bad ki nongïalam jong ka seng halor kaei kaba ki don ban pynsngew ne ban ong ha kane ka jingïalang jong ka All Party Meeting, hynrei u la pynpaw pat da kaba ong ba ka seng hi kan ïeng skhem ha ka nongrim ban nym pdiang ban wanrah ïa ka lynti rel katba ka rukom treikam kam pat biang.
“Ka nongrim jong ka seng ka long ba haduh mynta katba kam pat don ka rukom treikam kaba biang, ngi dang pyrshah hi ïa ka lynti rel,” ong u Bah Titos.
Halor ka jingkyntait jong ka Voice of the People Party (VPP) ban ïashimbynta ha katei ka jingïalang jong ki seng saiñ pyrthei ban pynsngew halor ka jingthmu ban wanrah ïa ka lynti rel, u Bah Titos u la ong ba ka jingbym treh ban ïashim bynta da ka seng VPP ha katei ka jingïalang, ka shong ha ka jingsngew jong ki bad ong ba kam mut ba lada ki leit ban ïashim bynta ha katei ka jingïalang kan mut ba ki ïashah noh ïa katei ka mat.
“Kata ka shong ha ka jingsngew jong ki lehse, ka jingsngew jong ki da ka jingbym ïashim bynta ka mut ba ki pyrshah beit lane ngam lah ban ong. Kam mut ba haba ngi ïashim bynta ha ka jingïalang ngi ïashah beit ïa kata ka mat. Em, haba ngi leit hangto ka mut ïa la ka nongrim, ka jingïohi bad ka jingai jingmut jong ngi ïa kaba ngin ai hapoh ka jingïalang,” ong u Bah Titos.
Ha kaba ïadei bad ki kynrum-kynram kiba mih ha ka thungkam-thungjam ïa ki nos ha NEIGHRIMS Hospital, u Bah Titos u la ong ba ka Sorkar ka dei ban shimkhia ïa kane ka mat namar ba na ka liang ka seng hi ka ai jingkyrshan ïa kaei kaba ki sengbhalang ki la pynsngew halor kane ka mat.
“Ki don ki mat kiba kum ka seng lehse, ngi sngew donkam ban ïashim bynta hynrei ki don pat ki mat kiba ngim sngew dei shuh ban dang ïashim bynta. Na ka liang jong ngi, ngi ïohi ba kaei kaba ngi leh ka long kaba biang,” ong u Bah Titos.
