Shillong, Jylliew 06
Ki nongshong die riewhadem harud surok bad kiba shim pisa bai ïeng kali ha Dympep kaba mar-mar shiliang ka jingkieng Mawkdok ki la pynpaw ba kat dang shah kynthoh ïa ka thaiñ Sohra halor ka jingjah ki shikurim na Indore katta ki nongjngohkai pyrthei ki dang bun.
Ka jingïoh ban ïakren bad ki nongshong die riewhadem ha Dympep ka dei namar kane ka jaka ka long kum ka khyrdop ban rung ki nongjngohkai pyrthei sha thaiñ Sohra.
Na ka liang ki nongdie riewhadem ki la pynpaw ba ka la hiar ka ïew mar shu jia ïa ki shikurim hynrei ki don kiba pynpaw ba don ki sngi kiba ïaid bad don ki sngi ki bym ïaid. Ki la ïathuh ba ïa u riewhadem ïa uba la kham heh ki die T.50 bad uba kham rit ki die T.40 haduh T.30 uwei. Nalor kane, ki la ïathuh ba kim shym la ïohi ba kan hiar ka kam jngohkai pyrthei ha Sohra namar ki kali ki dang bun kiba hiar sha Sohra.
Katba kiba lum bai ïeng kali ki la ïathuh ba ki kali kiba kit ïa ki nongjngohkai ki dang bun namar ka jaka ïeng kali ka dap beit man ka kynta.
Ki la ïathuh ba ka jingkynthoh ba jah ki shikurim na Indore, kita ka Sonam Raghuvanshi bad u Raja Raghuvanshi kam ktah namar kiba wan kai ki bun man ka sngi.
Kum ban shu pynkynmaw, ki khubor ba la pynmih ha kiwei ki jylla ki la kynthoh ïa ka thaiñ Sohra namar ka jingjah jong ki shikurim (u Raja Raghuvanshi bad ka Sonam Raghuvanshi) haba ki leit kai sha Nongriat.
Kane ka jingkynnoh ka la nang jur shuh shuh hadien ba la lap ïa ka metïap u Raja na riat Wei Sawdong ha ka 2 tarik u Jylliew bad kat haduh mynta ïa ka Sonam ym pat lapdien.
