Pyongyang, Jylliew:
Katkum ki khubor, la ong ba ka North Korea ha kane ka kynti, ka la ioh ban plie thymmai ia ka jhad thma kaba la shah pynjulor ha u bnai Jymmang ha ka por ba ka la pyrshang pyntreikam nyngkong.
Hadien ba la pynbha biang ia ka jinglong- jingman jong katei ka jhad kaba don ia ka jingkhia kumba 5,000 ton ha kaba sdang jong u bnai Jylliew, la sdang pyntreikam biang ia ka ha ka Sngi Palei bad mynta ka la ioh ban ieng ha kawei ka kad lieng jong katei ka ri.
La ong ba ki kynhun ba dei khmih, kin sa leit ban peit-thuh ia ka jinglong- jingman bad ka jingjulor jong katei ka jhad naka bynta ban nang ioh pynbha shuh- shuh sa haba iadei bad kiwei pat ki bynta.
U nongïalam ka North Korea, u Kim Jong Un, uba la sakhi ïa katei ka jingpyrshang pyntreikam kaba nyngkong ia katei ka jhad thma, ula kynthoh ïa katei ka jingjia, ba ka dei na ka daw jong ka “jingbym shimkhia” kaba la pynsniew ïa ka burom jong ka ri bad u la hukum ruh ban pynbha pura biang ïa katei ka jhad hashwa ka jingïalang jong ka seng.
