Shillong, Jylliew 06
Uwei napdeng ki shipara kiba la shah dung da ka tari ha uwei nongtuh ha ka step phyrngab jong ka 05 tarik u Jylliew 2025 bad mynta u dang shah sumar ha Robert Hospital, Shillong, u la ïathuh ba u la shah dung da ka tari na ki bynta jong ka lbong ka dei hadien ba u la ïakhun ban bat ïa u nongtuh.
U la ong ba ha ka por ba kitei ki nongtuh ki la phet krad, baroh ar ngut shipara ki la leit ban kthong bad dei ha ka por ba u la ïoh ban pynkyllon ïa uwei nongtuh ha madan, mar kumta uta nongtuh u la sei da ka tari ban dung na ka lbong ha kaba um lah shuh ban ïaleh ban bat ïa uta u nongtuh.
U la ïathuh ruh ba ha ka por ba uta u nongtuh u la mareh, u la sei lypa ïa ka tari ban bat ha ka kti.
“U hynmen pat ha ka jingbymtip eiei ba u nongtuh u don ïa ka tari ha ka kti u la leit ban bat, bad ha kata ka por u nongtuh u la ïoh ban ot sa ïa u hynmen na ka kti,” ong u para.Halor katei ka jingjia u la ïathuh, ba nyngkong ki la ïoh ban bat shwa ïa kitei ki nongtuh baroh ar ngut bad hapdeng ka jingïakren ba jaijai, uwei napdeng kita kiba tuh u la phet krad noh. Kumta baroh ar ngut shipara ki la kthong bad ïoh bat biang ïa utei u nongtuh, hynrei namar ba u la ïoh ban dung da ka tari kim lah shuh ban beh bad u la lait phet noh, katba uwei pat u la shah bat bad la aiti noh sha ki bor pulit.
Haba ïadei pat bad ka koit ka khiah, na ka liang utei u samla u la ïathuh ba ïa mynta hi nga la kham ïohbor bad sngewkhlaiñ bad ka bam ruh u la bam bha, hynrei shiliang ka kjat kaba shah dung da ka tari pat um pat sngewthuh bha bad ym pat lah ban ïaid.
Kum ban shu kdew hangne, kane ka jingjia shah dung bad shah ot tari jong kitei shipara ka dei kaba la jia ha ka step phyrngab jong ka Sngi Palei ha Mawlai Nongkwar, Block 13 ha ka por 3 baje eiei, katba ki dang ïakhun ban ïoh bat ïa ki nongtuh kiba la thmu ban phet krad.
