Washington, Jylliew:
Ka United States ha ka Sngi Palei, ka la pynngat kyndon pyrshah ia 4 ngut ki nongbishar jong ka International Criminal Court halor ka jingpynngat kyndon bad ka jingthmu phah kem ia u Myntri Rangbahduh ka Israel- u Benjamin Netanyahu. Kitei baroh 4 ngut nongbishar ki dei ki kynthei bad kin shah khang noh syndon ban leit rung ne shong sah hapoh United States na ka bynta kino-kino ki kam ne ki jingdonkam ha katei ka ri.
Namar la ong ba ka US kan nym ailad ia kum kine ki jingleh bym suitñiew ia ka bor bad ka hok jong ka US bad ki paralok jong ka, khamtam ka Israel bad kumjuh ruh ia kito kiba pynthut ia kiwei ruh ki paralok jong ka US.
Kumjuh, na ka liang jong katei ka ïingbishar, ka la pynphai jubab da kaba ong ha ka jingpynbna ba kine ki sienjam ki long ka jingpyrshang kaba shai ban pynduh ia ka jinglong laitluid jong ka tnat bishar jong ka pyrthei kaba treikam hapoh ka jingbthah na ki 125 tylli ki dkhot kiba iadon bynta na kylleng ki bynta jong ka pyrthei.
Ar ngut na ki nongbishar, ka Beti Hohler na Slovenia bad ka Reine Alapini-Gansou na Benin, ki la ïashim bynta ha ki jingbishar kiba la pynlong ïa ka hukum ban kem ïa u Netanyahu, kaba la pynmih ha u bnai Naiwieng mynshem snem.
Namar la ong ruh ba ka ïingbishar ka la lap ïa ki “nongrim kiba biang” jong ka jingkitkhlieh kam runar da u Netanyahu bad u Myntri kam pohiing barim jong ka Israel, u Yoav Gallant, na ka bynta ki kam kiba kynthup ïa ka jingpyniap beiñ ia ki mynsiem ba lui-lui ha Gaza bad ka jingpynshah thngan ia ki paidbah katei ka nongbah jong ka Palestine, hadien ka jingleit thombor jong ka Hamas ia ka Israel ha ka 7 tarik u Risaw 2023.
Katba ar ngut kiwei pat ki nongbishar, ka Luz del Carmen Ibanez Carranza na Peru bad u Solomy Balungi Bossa na Uganda, ki dei shibynta jong ka jingbishar jong ka ïingbishar, kaba la pynlong ban ai bor ban tohkit halor ki jingkynnoh, ba ki shipai US, ki la leh ïa ki kam runar ha ka thma ha Afghanistan. Hynrei la jan baroh ki ri Sepngi jong ka ri America bad kumjuh ruh ka Japan bad ka South Korea, ka bynta kaba khraw jong ka Latin America bad ka bynta kaba bun jong ka Africa ki dei ki bynta jong katei ka aiñ bad ha ka jingmutdur la bthah ia ki, ban kem ia kiba suba donkti haba ki hiar ha ka khyndew jong ki.
