Rung quarter ka St. Anthony’s, Rev. T.J. Jones, Shillong Vidhyalaya & H.Elias ha ka Under-17 Subroto Cup

Shillong, Jylliew 06

Ka jingïalehkai Under-17 (shynrang) jong ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills District ka la nangjam shaphrang ha kaba ka St. Anthony’s HSS, Rev. T.J. Jones Presbyterian School, Shillong Vidhyalaya SS bad ka H. Elias Memorial HSS ki la jam sha ka quarter final.

Ha ka jingïakhun pre-quarter final kaba la long ha ka Sngi Thohdieng ha SAI Training Centre, Shillong, ka St. Anthony’s HSS ka la pynliem noh ïa ka Ramakrishna Mission School da 5-0 kol. U Ïateiborlang Thawmuit u la thep ar kol ha ka minit kaba 4 & 22 bad kiwei pat la thep da u Manlangki Manar (8), Kenny George Jyrwa (36) bad u Adriano Khongsdir (55).

Ka Sacred Heart Boy’s HSS ka la shah rem noh ha ka Rev. T.J. Jones Presbyterian School lyngba ka shi kol ba la thep da u Reggie Raplang Wankhar ha ka minit kaba nyngkong. Ka Shillong Vidhyalaya SS ka la pynliem noh ïa ka Assam Rifles Public School da 3-1 kol. Ïa kine kol la thep da u May May Nongtdeh (5), Ricky Wanniang (26) bad u Kitbok Maskut (28), katba na ka Assam Rifles la thep da u Medonbanshan Kurkalang (45).

Ka H. Elias Memorial HSS ka la pynliem noh ïa ka Mount Hermon HSS lyngba ka shi kol ba la thep da u Gabriel Samiam ha ka minit kaba 36.