Jowai, Jylliew 06
Ha ka thong jong ka Rani Laxmibai Atma Raksha Prashikshan, ka District Mission Coordinator, SSA West Jaiñtia Hills ha ka Sngi Thohdieng ka la sdang ïa ka prokram ai jinghikai kyrpang na ka bynta ki khynnah kynthei kumno ban ïada ïalade na ki ‘riew shim kabu kaba tip kum ka Self-Defense Training for Girl’s Students.
Kane ka jinghikai kan neh lai bnai kynthih na ka bynta saw tylli ki skul hapoh ka sor Jowai ba kynthup ïa ka R.C. Eve Mihmyntdu UPS SSA, Panaliar SSA UPS, Thadlaboh Presby-terian UPS SSA, Q.C. Springside UPS bad Panaliar UPS SSA.
Shwa ban sdang ka jinghikai ka la don ka jingïalang lyngkot ba la pynïaid da ka Kong Baïahunlang Phawa, Asst. Teacher R.C. Eve Mihmyntdu bad la ïoh ka jingbatai shaphang ka Self-Defense Training na u Bah Alan Niangti, President ka West Jaiñtia Hills Karate Do Association bad na ka Kong Sam-I-Naki War Passah, Member (WJHKDA), Jowai.
La ïoh ruh ka jingkren na u Bah S.D. Laloo, Community Mobilizer, SSA bad ka jingkren ai mynsiem ïa ki khynnah skul na u Fr. H. Lamare, Parish Priest ka Jowai Diocese uba long kum u kongsan ha kane ka prokram.
U Fr. H. Lamare ha ka jingkren u la kyntu ïa ki khynnah ban long kiba nang ban ri ïa ka burom ka akor bad ban pynleit jingmut ha ka por shah hikai khnang ban ïoh jingmyntoi na kane ka prokram.
Ha kane ka sngi ki dkhot ka West Jaiñtia Hills Karate Do Association hapoh ka jingïalam u Na-oo Mankiwi War Passah, Instructor 2nd Dan Black belt bad u Ribeit O Pde, Instructor 1st Dan Black belt ki la pyni hapdeng ki khynnah ïa ki buit ki lad kumno ban ïada ïalade haba don ki briew kiba thmu ban thombor pyrshah ïa ki.
