Shillong, Jylliew 06
Ki bahaïing jong u Raja Raghuvanshi, uba dang shu dep ïathoh na Indore, Madhya Pradesh, ïa kaba ka met jong u la lap na kawei ka riat ha ka thaiñ Sohra, Meghalaya, ki la thoh shithi sha u Myntri Rangbahduh ka ri, u Narendra Modi, ban kyrpad ïa ka jingtohkit jong ka Central Bureau of Investigation (CBI) halor kane ka jingjia.
U Raja Raghuvanshi, u la jah rngai noh ha ryngkat ka kurim jong u, ka Sonam, ha ka por ba ki leit ‘honeymoon’ ha kane ka Jylla jong ka Thaiñ Shatei Lam Mihngi. La ïohi khatduh ïa kitei ar ngut ha ka 23 tarik Jymmang.
Hadien kata, ha ka 2 tarik Jylliew, la lap ïa ka met jong u Raja na kawei ka riat ha ka thaiñ Sohra, Meghalaya katba ka Sonam ka dang jah rngai, bad ka jingwad ban lap ïa ka, ka dang ïaid shakhmat.
U hynmen jong u Raja Raghuvanshi, u Vipul Raghuvanshi, u la ong ba ki la thoh da ka shithi sha u Myntri Rangbahduh ban kyrpad ïa ka jingtohkit CBI bad ki la aiti ïa ka ha ka ophis jong u Commissioner, katkum ka khubor ka ANI.
U la ong ruh ba ki kwah ba u Myntri Rangbahduh lem bad u Myntri Rangbah, baroh ar ngut kin ai ka jingkyrshan ïa ki bad ban ïaid shakhmat bad ka jingtohkit CBI halor kane ka kam.
U la ong ba kane ka lah ruh ban wanrah ïa ka hok ïa u Raja bad ban pynsuk ha ka ban wad ïa ka Sonam.
“Ka rukom treikam jong ki pulit Meghalaya halor kane ka mukotduma, kin ym wanrah ïa ka hok ïa u Raja,” u la ong.
Ha kawei ka liang, u Myntri Rangbah ka Meghalaya, u Conrad K. Sangma u la pynpaw ïa ka jingsngewkhia bad ong ba ka long ka jingjia kaba sngewsih. U la ban jur ruh ba yn sa shim ïa baroh ki sienjam kiba donkam ban kem ïa kito kiba donkti sha lyndet jong katei ka jingjia.
“Uwei u briew u la shah pynïap bad kawei pat ka la jah rngai. Kane ka dei ka jingjia kaba sngewsih. Ngim pat ju ïohi ïa kum kane ka jingjia mynno-mynno ruh ha Meghalaya…nga kner ïa ka jingsngewlem jong nga sha ki bahaïing bahasem bad nga kwah ban ong ïa ki ba ka dei ka mukotduma kaba kongsan bha na bynta jong ngi. Ngin shim ïa baroh ki sienjam kiba donkam ban tohkit bad ban kem ïa kiba donkti sha lyndet jong kane ka jingjia. Nga pyntikna ïa ki bahaïing bahasem ba ka Sorkar Jylla jong ngi bad ki bor pulit ki leh katba lah ban tohkit ïa kane ka jingjia,” ong u Sangma.
Kitei shijur ki la ïathoh shongkurim ha ka 11 tarik u Jymmang mynta u snem bad ki la mih ban leit kai sha Shillong na Indore ha ka 20 tarik u Jymmang. Ki bahaïing bahasem ki la ïoh ban ïakren khatduh bad kitei ar ngut ha ka 23 tarik u Jymmang bad ka ‘phone’ jong ki ka la lip noh ha ka janmiet jong katei kajuh hi ka sngi, katkum ki bahaïing.
