Shillong, Jylliew 06
Ki pulit lem bad katto-katne ngut ki ‘riew paidbah ki la kem noh ïa ar ngut ki briew katba ki dang pyrshang ban lute na uwei u nongïaid lynti hajan Nongrim Hills.
Hadien kiba bun ki jingujor na ki nongleit nongwan ba ki la shah lute ha ar ngut ki briew ki bym lah ban ithuh satia bad kiba ju shong da kawei ka ‘Scooty’ rong ïong, ka Special Team na thanat Laitumkhrah ba la ïalam da ka OC Laitumkhrah ha ryngkat katto-katne ki nong samaria babha ki la kem noh ïa ar ngut ki briew kiba shong da ka ‘Scooty’ rong ïong hajan NEC, Nongrim Hills katba ki dang pyrshang ban lute na uwei u nongïaid lynti. Ha katei ka jingjia kaba la jia ha ka por kumba 8.10 baje mynmiet, kitei ar ngut ki la dung ruh da u ‘screwdriver’ ïa utei u nongïaid lynti na ka kpoh.
Ïa kitei ar ngut la tip kyrteng kum u Kitbok Thabah (27 snem ka rta) na Golflink bad u Melvin Tongwah (22 snem ka rta) na Lumshyiap.
Ha kajuh ka por, la pynngat ïa 2 tylli ki mukotduma ha Laitumkhrah mynta u snem pyrshah ïa ki halor ka jinglute ha ki ar tylli ki jingjia – kawei ha ka 10.04.25 ha ka por 8.30 baje mynmiet hajan Bawri Mansion ha kaba ki la lute T.19000, katba kawei pat ka dei ha ka 3.06.2025 ha ka por 7 baje mynmiet hajan Nagaland House ha kaba ki la lute T.5000.
Shuh shuh la ïoh lum jingtip ba kitei ar ngut ki ju mlien ban leh ïa kum kitei ki jait kam ïa kiba bun kiwei-kiwei ki bym shym la wan mih shakhmat ban ujor.
Ïa u Melvin Tongwah la kem kham mynshwa mynta u snem namar ka jinglute na ki briew ha kylleng ka thaiñ Polo bad la kem ïa u da ka Pasteur Beat House.
