Shillong, Jylliew 06
U Bah Titosstarwell Chyne uba dei Working President ka United Democratic Party (UDP) u la ong ba na ka liang ka seng ka dap da ka jingsngewkhia haba ïadei bad ka jingmih ki kynrum-kynram hapoh ka Skulbah North-Eastern Hill University (NEHU) khamtam ha ka jingbym don ïa u khlieh nongsynshar ne u Vice-Chancellor uba pura kaba la wanrah ïa ka jingpynthut ha ka pule-puthi hapoh katei ka skulbah.
Haba kren sha ki lad pathai khubor, u Bah Titos u la ong ba na ka liang ka UDP ka ïeng ha ka nongrim ban dawa ïa ka Sorkar Jylla bad khamtam ïa ka Sorkar Pdeng ba kan tuklar lem halor kane ka kam mardor katba lah.
“Ki dei ban pynbeit noh kham kloi ïa kane ka mat kaba la neh slem bha hapoh ka Skulbah khamtam ka jingbymdon ïa u Vice-Chancellor bapura kan pynthut ïa ka pule-puthi hapoh ka Skulbah. Na ka liang jong ngi ka UDP ruh ngi ïeng ha kajuh ka nongrim ba ngi dawa khamtam ïa ka Sorkar Pdeng bad ka Sorkar Jylla ba kin tuklar halor kham kloi katba lah halor kane ka kam”, ong u Bah Titos.
Ha kaba ïadei bad ka jingshim bynta jong ka seng ban pynkhreh ïa ka ilekshon MDC sha Garo Hills Autonomous District Council (GHADC) ka ban sa long la shem snem, u Bah Titos u la ong ba ka seng ka la ïakren bad rai ba kan sa pynlong da ka jingïalang jong ka seng ha ka 27 tarik u bnai Jylliew, 2025 na ka bynta ban ïakren kham sani bha halor ka jingpynkhreh jong ka seng ïa katei ka ilekshon.
U Bah Titos u la ong ruh ba na ka liang ka seng ka don ïa ka jingsngewskhem ban trei kham bha ha une u snem ban sa wan ha Rilum Garo.
