Khliehriat, Jylliew 06
U Symbud Myntri Rangbah ka jylla uba long ruh u Chairman ka Regional Committee on Interstate Border na bynta ka East Jaiñtia Hills, Bah Sniawbhalang Dhar ha ka 6 tarik Jylliew u la pynïaid ïa ka ‘Review Meeting’ ha ka jingïalang ‘Assam Meghalaya Boundary MOU’ ha kaba ïadei bad bad u pud u sam ka Ratacherra khamtam ha ka jingïadei ban kynthup ïa ka shnong Baikam sha Meghalaya.
Ha kane ka jingïalang bishar bniah la donlang u Deputy Commissioner jong ka East Jaiñtia Hills District, u Shivansh Awasthi, ka Additional Deputy Commissioner ka East Jaiñtia Hills District, Kong J.U Kharpuri, u SP ka East Jaiñtia Hills District, Giri Prasad, u Sub-Divisional Officer (Sardar), M. Kumar, u Additional Superintendent of Police, East Jaiñtia Hills District S.
Paslein, u Block Development Officer, Wapung C&RD Block, East Jaiñtia Hills District, u M. Kyndait, ki waheh shnong kynthup jong ka Baikam, Ratachera, Malidor bad ki nongshong shnong ka Baikam.
Haba pyntip sha ki lad pathai khubor hadien ka jingïalang u Symbud Myntri Rangbah, Bah Sniawbhalang Dhar u la pyntip ba ka shnong Baikam ka don 37 tylli ki longïing bad na kine, 30 tylli ki longïing ki la pynpaw ba ki kwah ban don sha ka Meghalaya.
U la ong ruh ba ka jingïalang mynta ka sngi ka long kum ka rynsan kaba kongsan ïa baroh ïa ka Regional Committee bad ki nongshong shnong ban ïakren ïa kane ka jingeh bad ba yn sa pynlong shen ïa ka jingïalang ba khatduh hapdeng u Deputy Commissioner, East Jaiñtia Hills District bad na Assam ban ïakren shuh shuh halor kane ka jingeh shwa ban shim ïa ka rai kaba khatduh.
Hadien ka jingïakynduh hapdeng u Deputy Commissioner, East Jaiñtia Hills bad na Cachar District, ïa ka kaiphod yn aiti da ki bor synshar District sha ka sorkar jylla ban leh ïa kaba donkam.
Haba kren halor ki skhim pynroi ba la ïoh da ki nongshong shnong ka shnong Baikam, u Deputy Chief Minister u la ong ba mynta ki paidbah ki ïoh ïa ki jingmyntoi na baroh ar tylli ki jylla Meghalaya bad Assam bad kumta donkam ban pynbeit ïa ka rai kaba khatduh khnang ba ki paidbah kin ïoh ïa ka lad kaba paka tam na ki skhim sorkar.
Ha kajuh ka por, u Deputy Commissioner ka East Jaiñtia Hills District, u Shivansh Awasthi u la pyntip ba la pynlong bun tylli ki jingïalang ha ki por ba la dep, kynthup kawei bad u Deputy Commissioner ka Cachar ban ïakren ïa ka jingeh kaba dang sahteng jong ka Baikam da ka jingthmu ban pynbeit ïa kane ka jingeh.
